Knud Rasmussenip nanivai
Angutit marluk Savissivimmit Kullorsuarmut ingerlaarlutik Qimusseriarsuarmi tammaaneqartut, arfininngornermi unnukkut arfineq-marluk missaani ajunngitsut nanineqarput, Upernavimmi politiit paasissutissiipput
Angutit marluk umiatsiaminnut orsussaaruttoorsimapput Kullorsuarmut tikitassasut naatsorsuutigisartik suli tikinnagu.
Savissivimmit umiatsiamik Kullorsualiarlutik aallarput oktobarip sisamaanni. Tikiffissaattut naatsorsuutigisami suli apuutinngimmata oktobarip arfineq-aappaanni tamanna nalunaarutigineqarpoq, ujaasinerlu aallartinneqarpoq sakkutuut timmisartuat challenger, umiarsuaq alapernaarsuut Knud Rasmussen aamma politiit angallataa Sisak II peqataaffigisaanni. Umiarsuit arfininngornermi oktobarip arfineq-pingajuanni Qimusseriarsuarmut pipput, Savissiviup Kullorsuullu akornanni sineriak ujaasiffigilerlugu.
Knud Rasmussenimi sulisut angutit marluk arfininngornermi unnukkut arfineq-marluk missaat ulluni sisamani taammaasanik nassaarinnipput, Upernavimmi politiit ilisimatitsipput.