Skip to main content

CIA misissuiffigineqarnissaa suli periarfissaavoq

Udenrigsministeri Villy Søvndal arsaq justitsminister Morten Bødskovimut ingerlatitseqqippaa

Politikkerit amerliartuinnartut Danmarkimi naalakkersuisut CIA'p tigusanik timmisartuussisarsimagaaneranik pasilliut  arlaannaannulluunniit attuumassuteqanngitsunit misisorneqarnissaanik piumasaqarsimannginnerat kamassaatigigaat, ilimanarsiartuinnarpoq suliaq ingerlaqqeriarfissaqartoq. 

Taama udenrigsminister Villy Søvndal sermitsiaq.ag'mut oqarpoq.

- Naalakkersuisooqatigiit isumaqatigiissutaanni allassimavoq Irak'imi sorsunnermut peqataanerup tunuliaqutaa misissorusukkipput aammalu sorsunnermik ingerlatsinermut tunngatillugu, nunat tamalaat akornanni isumaqatigiissutit eqquutsinniarnerini ajornartorsiutitaqarsinnaanersut ilisimalissallutigu. Taamaattumik naggaterpiaatigut justitsministerip suliassaraa nalilissallugu CIA'p timmisartuussisarnerinik ilaqassanersut, Villu Søvndal oqarpoq.

Taama oqarnermigut ulluni kingullerni Nunatsinni Danmarkimilu politikkerit akornanni oqallisaaqisoq udenrigsministerimit allatut oqallisigineqarsinnaanngorsinneqarpoq. 

Maanna naalakkersuisuulersut illuatungiliuttuugallaramik Socialdemokratit, Enhedslisten, SF aamma Det radikale Venstre, Kalaallit nunaannit tapersersorneqarlutik neriorsuutigaat pasitsaassap arlaannaannulluunniit attuumassuteqanngitsunit misissuiffigineqassasoq namminneq naalakkersuisunngortitsissagaluarunik. Tamassuma nassatarissavaa ilaatigut atorfillit ilisimannittutut killisiorneqarsinnaanerannik kinguneqassaaq, neriuutigalugu CIA Danmark, Kalaallit Nunaat aamma Savalimmiut qulaallugit unioqqutitsillutik timmisartuussisarsimanernut paasissutissanik pissarsisinnaaneq. Taamaattoqarsimappammi inuit pisinnaatitaaffiinik unioqqutitsineq angisooq pisimassammat.  

Taava ippassaq oqaatigineqarpoq naalakkersuisut Kalaallit Nunaannut neqeroorutigisinnaasaasa kisiartarigaat, CIA'p timmisartuussisarsimanerinik pasitsaasat pillugit pappiaqqat uppernarsaatinik pisisinnaagaa. Taannali neqeroorut Naalakkersuisut siulittaasuata Kuupik Kleist'ip upernaaq manna justistminister Lene Espersenimit pereerpaa. 

- Partiit pingasut naalakkersuisuutitaqarput taamattumik piumasagut tamaasa pisinnaanngilagut, Villu Søvndal oqarpoq tunniuteriikkamik tunniusseqqinnissamik neqeroorutini nassuiarlugu. Taassuma neriorsuutaagaluartup pineqarsinnaannginnera siullermik nassuiaaserpaa, ataatsimiititaliarsuarmik misissuisitsinissamik aallartitsinissaq akisuallaassammat pinngitsoortinneqartariaqartoq. 

Inuit pisinnaatitaaffiisa unioqqutinneri aningaasanngorlugit naatsorsorneqarsinnaappat?

- Taama aperineq patsisissaqarluarpoq. Taamaattumik naalakkersuisooqatigiinnermik isumaqatigiissummi anguniarneqarpoq, nunat tamalaat akornanni isumaqatigiissutit atuutsinniarneqarneri ajornartorsiutitaqarnersut misissorneqartariaqarput.

Tamaammat arsaq justistsminister Morten Bødskovimut ingerlateqqippiuk?

- Aap, Villy Søvndal akivoq.

Naalakkersuisut siulittaasuat, Kuupik Kleist, ilisimatitsivoq qaammatip naanerani Villy Søvndal, CIA'mut tunngassuteqartoq pillugu ataatsimeeqqatigissallugu. 

- Una saqqummiutissavara; CIA'p timmisartuussisarneri Irak'imut sorsunnermut attuumassuteqarput taamaattumik misissuiffigineqartariaqarpoq. Taassuma saniatigut maannamut allamik oqaasissaqanngilanga, Kuupik Kleist oqarpoq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER