Qaqortumi mittarfimmut 11-it akuersipput

Kommune Kujallermi kommunalbestyrelsimi amerlanerussutillit ippassaq sisamanngornermi Assartuinermut Ataatsimiititaliap Qaqortumi mittarfiliortoqarnissaanik taamalu Narsarsuup matunissaanik inassuteqaataa akuersissutigaat.

Taasinermi 11-it isumaqataapput. Tassaapput Atassummit ataaseq, Demokraatinit ataaseq, IA-mit pingasut Siumumillu arfinillit.

Marluk akerliupput, tamarmik Siumumeersut.

Marluk taasinngillat, Siumeersoq IA-meersorlu.

Qaqortumi Siumut isumaqarpoq Qaqortoq mittarfittaassasoq Narsarsuarmilu mittarfissuaq matuneqarluni, Qaqortumi Siumup siulittaasua Lars Lundblad oqarpoq.

- Ukiut 20-25-it matuma siornatigutut Henrik Lund siuttuugallarmat partii isumaqarpoq, nangilluni oqarpoq.

- Qaqortumi mittarfittaaq ateqassaaq "Jonathan Motzfeldt Airport", taanna Simon Simonsenip siunnersuutigimavaa, Lars Lundblad paasissutissiivoq.

Kommune Kujallermi IA sinnerlugu kommunalbestyrelsimut ilaasortaq oqaaseqartartorlu oqarpoq Qaqortumi mittarfiliornissamut IA-p tunngavilersuutigigaa, sumiluunniit najugaqaraluaraanni pingaaruteqartoq isumannaannerpaamik pitsaanerpaamillu angallanneqarnissaq, aallaraanni angerlaraanniluunniit.

- Kujataani attaveqarniarneq ullutsinnut naleqqutinngilaq akilersinnaananilu. Kissaatigaarput nutatta sutigut tamatigut ineriartorteqqinnissaa. Minnerunngitsumik kissaatigaavut attaveqarneq pitsaanerusoq, akit appasinnerusut kiisalu aaqqissuussineq pitsaanerusoq, pisariaqartillugu annertunerusumik siuariarniassagatta.

- Taamatut naatsumik oqaaseqarluni Kujataani Inuit Ataqatigiit nalunaarutigissavaa Qaqortumi 1199 meterinik takissusilimmik mitttarfiliornissamik siunnersuut tapersersoripput. Uuliasiorneq, aatsitassarsiorneq inuussutissarsiutillu allat pilersinneqareerpata mittarfik 1799 metrinut tallineqarsinnaavoq, Lasse Davidsen, partiip kommunalbestyrelsimi oqaaseqartartua, malillugu IA oqarpoq.

Oqaaseqaammini IA nangippoq:

- Malugeqqussavarput Qaqortumi Inuit Ataqatigiit siorna novembarimi Qaqortumi mittarfiliornissaq tapersersorlugu taasimmat, pissutigalugu tamanna siusinnerusukkut siunnersuutiigisimagatsigu, tamatumunngalu isumarput allanngorsimanngilaq. Suliassarlu oqallisigineqaqqittussanngormat kissaatigisimavarput siunnersuut taasissutigineqassasoq. Kommunalbestyrelsip aalajangernera nuannaarutigisorujussuuvarput, siunnersuut maanna naalakkersuisunut ingerlateqqinneqassammat, Kujataani IA sinnerlugu kommunalbestyrelsimut ilaasortat sisamat Ingemann Dorph, Henrik Brummerstedt, Lisbeth Søvndahl Pedersen aamma Lasse Davidsen oqarput.