Demokratit piffissaasorinngilaat

Partiit tallimat tamarmik inatsisartut ataatsimiittarfianni sisamanngornikkut ualikkut isumaqatigiipput nunatsinni tunngaviusumik inatsiseqalernissaq anguniarlugu suliniaqataajumallutik - naak tunngaviusumik inatsit Demokraatit aamma Atassutip "naatsiivianni" naasuunngikkaluartoq.

Kisianni Demokraatineersoq Niels Thomsen aamma Siverth K. Heilmann, Atassut tamarmiullutik ataqqivaat, amerlanerussuteqartut Inuit Ataqatigiit, Siumut aamma Katuusseqatigiit Partiiat nunatsinni tunngaviusumik inatsiseqalernissamik suliniummik aallartitserusunnerat. Partiit marluk amerlanerussuteqartunik tapersersuigaluarlutik, tunngaviusumik inatsimmik suliniut ataatsimoorussaasariaqartoq nunanillu marluinnit ingerlanneqartoq.

Demokraatit namminiilivinnissaq aatsaat angorusuppaat piffissanngorpat:

- Namminersorluni Oqartussaanerup eqqunneqarneraniit ukiut marluinnaat ingerlapput, piffissap taassuma iluani naammassisagut suli ikipput, nukissallu pitsaanerusumik namminersorluni oqartussaanerup iluani allanik anguniagalersunngikkaluarluni atorneqartariaqartut, Niels Thomsen isumaqarpoq.

Naatsumik oqaatigalugu Niels Thomsen isumaqarpoq aningaasaqarneq avaqqunneqarsinnaanngitsoq:

- Sinnattut piviusullu immikkoortissinnaasariaqarpagut.

Ullumi Kalallit Nunaata ukiumut 3 ½ milliardit bloktilskuditut pissarsiarisarpai, naalagaaffiup suliassat allat ½ milliardimik koruuninik nalillit suliarisarlugit. Tamatuma saniatigut siunissami aningaasaqarneq ima isikkoqassangatinneqarpoq, nunatsinni aningaanik atuineq milliardip missaanik millisartariaqarpoq. Ukiumut milliardit tallimat atorfissaqartitavut pissarsiariniartariaqassavagut.

- Suliassaq taanna aatsaat naammassisinnaavarput ineriartortitsinikkut, atugarissaarnerunikkut, ilinniarnikkut kinaassuseqarnikkullu, tamakku pigilerutsigit nuna namminersortoq pilersissavarput, akissaqalerutta, Niels Thomsen oqarpoq.

Naalagaaffeqatigiinneq ataannarli

Atassutip kissaatigaa tunngaviusumik inatsimmik pitsanngorsaasoqartariaqartoq aatsaat paasineqarpat, naalagaaffeqatigiinnerup iluani tunngaviusumik inatsit atuutissanersoq imaluunniit Kalaallit Nunaanni namminersortumi Danmarkimut qilersorsimanani atuutissanersoq.

Atassut partiitut aallarteqqaaramili Danmarkip Kalaallit Nunaatalu ataveqatigiinnerannut ilisarnaatitut, naak Kalaallit Nunaat namminersortunngussagaluarpat Atassutip kissaatigaa, Danmarkimik naalagaaffeqateqarneq qanorluunniit iliornikkut attanneqassasoq.

Aningaasat puigornagit.

- Kalaallit Nunaanni aningaasaqarneq aqutsinerlu eqqarsaatigalugit suli nunarput piareersimanngilaq namminersulivissalluni, taamaattumik namminersorluni oqartussaanermi nukivut tamaasa pitsaanerusumik ingerlanneqarnissaanut atortariaqarpagut, Siverth K. Heilmann oqarpoq.