CIA-mik aaqqiagiinngissuterujussuaq naalakkersuisut nutaat ilaatinngilaat
S, R, SF aamma EL illua'tungiliuttuugallaramik piumasaraat CIA-p Danmarkip silaannartaatigut timmisartuussisarsimanera misissorneqassasoq. Maanna tamanna puigorneqarpoq. Amnesty International isorinnippoq
Maanna naalakkersuisuusut illua'tungiliuttuugallaramik ataatsimiititaliamik attuumassuteqanngitsumik sukkanerpaamik pilersitsinissaq piumasaraat, USA-p isertortumik paasiniaasarfiata CIA-p qallunaat silaannartaanni tigusanik isertortumik timmisartuussisarsimaneranik misissuisussamik.
Maannakkulli - illua'tungiliuttut pissaanermik tigusereersut - taamanikkunnit piumasaqaat naalakkersuisut tunngavissaanni nutaami, sapaatip akunnerani uani tamanut saqqummiunneqartumi, takuneqarsinnaanngilaq.
Tamannalu Amnesty Internationalip isornartorsiorpaa:
- Europarådimit kajumissaarneqaqattaartarsimagaluarluni CIA-p europap nunataani tigusanik programmiannik Danmarki attuumassuteqanngitsunik misissuisitsinngisaannarsimavoq, Amnesty Internationalip generalsekretæria Lars Normann Jørgensen, naalakkersuisut tunngaviannut qisuariaatitut nassuiaavoq.
- Naalakkersuisut nutaat aappaagu EU-mi siulittaasuunerminni europami misissuinissanut arlalinnut tatiseqataasinnaapput, unioqqutitsilluni tigusanik assartuinermut isertortumilu parnaarussivinnut akisussaaffimmik inissiiniassagatta.
- Taamaasiortariaqarpugut ajortuliorfigineqartut pissutigalugit uagullu nammineq pissutigaluta, taamatut pisoqaqqeqqunagu, Lars Normann Jørgensen oqarpoq.
Taamanikkut naalakkersuisuusut illua'tungiliuttullu akerleriinnerat kingullermik pilerpoq ukioq manna ukiut nikinnerisa kingorna, quppernerup nittartakkap Wikileaks-ip USA-p taamanikkut ambassadøriata James P. Cainip 2008-mi februaarip 7-ianni USA-p nunanut allanut ministereqarfianut nalunaarutaa, tassa qallunaat naalakkersuisui USA-mut ajornartorsiutinik pilersitsiumanngitsut, tamanut saqqummiummagu.
Nalunaarut nassiunneqarsimavoq ulloq taanna CIA-p timmisartuussisarnerinik attuumassuteqanngitsunik misissuisitsinissamik naalakkersuisut pinngitsoortitsiffianni.
Taarsiullugu naalakkersuisut suleqatigiissitaliorput DR tv-kut aallakaatitassiamik aallakaatitsereersoq, tassani ilimanarsineqarluni CIA ilaatigut nunatta silaannartaani tigusanik timmisartuussisarsimasoq.
Suleqatigiissitaliaq CIA-p tigusanik timmisartuussisarneranut uppernarsaatinik nassaanngilaq, tamannalu pissutigalugu illua'tungiliuttut attuumassuteqanngitsumik misissuisoqarnissaa piumasaraat. Misissuinissaq uppernarsarneqartoq saamerliit naalakkersuisunngorpata ingerlanneqassasoq.