Oqallisissiaq: Atlantic Music nersualaarneqassaaq
Fuzzi-p aaqqissuisuata Inunnguaq Petrussenip maanna aamma nuutinik saqqummersitsisarfik Atlantic Music nunatsinni nipilersornermut iliuuseqarsimanera pillugu nersualaarpaa
"Isumaluttutut allaaserisara" Sermitsiaq.AG-mut ilanngunneqarnerata kingorna imarisaa kiisalu Atlantic Music tusagassiorfiillu pillugit oqallittoqartorujussuuvoq. Oqallinneq pitsaasuusimavoq, nuannerporlu inuit taama tunniusimatigimmata, pingaartumik imminnut illersortut.
Pissutsit inissinniarlugit maanna arlalinnik nassueruteqassaanga! Immaqalu ajortisaarineq nammineq aallartissimasara unitsillugu.
»Allaaserisaq/oqallisissiaq" tamakkiisumik tusagassiorfinnut sammitinneqarsimavoq. Siunertaasimanngilaq kamallunga sakkortuumillu isorinninnera nettimut ilanngunneqassasoq. Takusinnaalluarpara sooq taama annertutigisumik paatsuuisoqarsimanersoq.
Aaqqissuisup nammineq pissutissaqarluni nettimut ilanngussimavaa, isumaqarami oqallinnermik pilersitsisinnaasoq. Taamaalluinnarporlu. Soorunamili oqaatsikka sakkortuut tamaasa akisussaaffigaakka. Oqallisissiarlu naatsuummat tunngavilersorneqarnanilu imminut erseqqissaateqarfigissaanga.
Uanga nammineq kalaallit nipilersugaat nuannarisorujussuuvakka nipilersukkanullu tamakkiisumik tunniusimavunga. Aamma nipilersornermik atuagassiami FUZZI aaqqissuisuuvunga. Oqartoqarsinnaavoq imminut pisarisunga nipilersornermik Atlantic Musicimilu suligama, kiisalu tusagassiorfinnik suliaqarlunga. Nalunaajaatima saqqummiunnissaannut imminut pilliutigerusuppunga. Aappassaanik ulorianartoqarpoq ingerlatsivinnut angisuunut taama malunnartigisunik Kalaallit Nunaanni isorinninnissaq, pingaartumik pineqartut qanimut attaveqarfigigaanni ikinngutigalugillu.
Mamiasunnerujussuannut pissutaavoq Frozen Media tusagassiorfinnut tamanut tusagassiorfitsigut nalunaaruteqarmat, ilanngullugillu cd-t aammalu video-nut nipilersukkanullu linksit pisariaqartut tamaasa. Sumilluunniit qisuariartoqannginnera uannut paasiuminaatsorujussuuvoq. Politikkitulli amerlanerussuteqartut pissaaneq tigummisarpaat, ikinnerussuteqartulli aamma tusaaniarneqassapput! Tamanna sunut tamanut ipssutaavoq.
Atlantic Music Kalaallit Nunaanni nipilersornermut iliuuseqarsimaneranut nersualaagassarujussuuvoq. Piffissami kingullermi nipilersornerup pitsaassusia qaffassiavaa. Aamma angusatik anguniarlugit tamaviaarlutik sulisimapput.
Taamaasilluni oqaatsinik atuinera iluarsereerlugu nalunaajaatikka imaapput:
Atlantic Music:
Nunatsinni nipilersornermut sunniuteqarniarlutik sorsussimapput. Akisuanerit Festivalili apeqquserpara, festivali tapersersorneqarluaraangami Atlantic Musicip nipilersortartuinnaanik kiisalu ULO-p (siammartigaata) nipilersortartuinik atuisarmat.
Aappassaanik suli isumaqarppugna equngassuteqartoq ingerlatsivik soqutigisalik timmisartumi nipilersukkanik aqutsippat.
Tusagassiorfiit:
Tusagassiorfiit tusagassiorfitsigut nalunaarutinik pisarput! Atortarsigit! Atlantic Music-imeersuinnaanngitsut.
Pilersuisoq:
Nuannaarutigalugu oqaatigisinnaavata Pilersuisup maanna cd-t saqqummersitsisarfinnit tamaneersut tuniniartalermagit. Saqqummersitsisarfinnut mikinerusunut Pilersuisup Atlantic Music innersuussutigisarunnaarpaa.
Naggataatigut oqaatigineqassaaq Kalaallit Nunaanni nipilersornerup piffiit nutaarluinnaat iserfigiartormagit nipilersukkanik nipinillu pitsaasorpassuarnik nunanillu tamalaanit sunnerneqarluartunik. Tamatumunnga pissutaapput nipilersortartut nipilersukkanik sanasut, saqqummersitsisarfiit periarfissiisut tusagassiorfiillu nutaarsiassanik siammarsaasut, soorunamilu naggataatigut nipilersukkanik nuannarisallit naalaartartut, nipilersukkat pitsaasuunersut naliliisartut.