Oqaluffinnut ministerinngortoq Ilagiinni anissamaaraluartoq

Manu Sareen aggusti qaammat nalunaarpoq Ilagiinnit Lutherikkuusunit anissamaarluni. Aarlerisaarutaannaasimavorli

Manu Sareen aggusti qaammat nalunaarpoq Ilagiinnit Lutherikkuusunit aniniarluni. Maanna oqaluffinnut ministerinngorpoq. Assi: Polfoto

Aggusti qaammat maanna Danmarkip oqaluffinnut ministerinngortitaa radikalineersoq Manu Sareen nalunaarpoq, Ilagiinnit Lutherikkuusunit aniniarluni. Taama politiken.dk allappoq.

Sareenip nalunaarutaannut tunuliaqutaavoq ilagiit lutherikkuusut suiaaqatiminnik katikkusuttunik ajattuinerat.

- Eqqarsaatigiuk Danmarkimi 2011 inuuvugut arnat angutillu suiaaqatiminnik atoqateqartartut suli oqaluffimmi katitinneqarsinnaanngitsut, sulilu asaqatigiinnertik pissutigalugu inooqatigiikkunik "nalunaarsorneqarsinnaaginnartut", Manu Sareen aggustip 20-ani politiken.dk-mut oqarpoq.

Taamani maanna oqaluffinnut ministerinngortup aamma oqaatigaa, pissutsit tamakku allanngortinneqanngippata Ilagiinnit Lutherikkuusunit aninissani eqqarsaatersuutigisarlugu, oqarluni:

- Isumaqanngilanga palasit suiaaqatiminnik katititsinissaminnut pinngitsaalineqassanngitsut, taakkuali katititsisinnaatitaasariaqarput, tamannalu suli anguneqartinnagu danskit ilagiivanni lutherikkuusuni ilaasortaaginnarnissara uannut tulluartuunngilaq. Sareenip taamani naqissuserpaa, qinersereernerup kingorna naalakkersuisunngortussat ajornartorsiut taanna allanngortinniarlugu qanoq iliuuseqartariaqartut:

- Taamaattumik isumaqarpunga qinersinerup kingorna folketingimi ilaasortanngortussat inatsit taanna qanoq iliuuseqarfigisariaqaraat, taamaasilluni suiaaqatiminnik atoqateqartartut oqaluffinni katissinnaalerniassammata. - Danmarkimi naalagaaffik oqaluffillu immikkoortinneqanngippata, Christiansborgimi politikkerit aappariit kikkulluunniit naligiissitaanissaat sulissutigisariaqarpaat, inuit aappassaminnik nassaarsimasut katinnissaminnillu kissaateqartut periarfissaqartinneqaqqullugit, Sareen nassuiaavoq.

politiken.dk naapertorlugu Manu Sareenip oqaaseqaatini tamakku pillugit ullumikkut ministeritut toqqagaanermini oqaaseqarusunngilaq.

eb.dk paasissutissiivoq Sareenip tusagassiinermut ikiortaata nalunaarutigigaa, Sareenip aarlerisaarutini piviusunngortissimanngikkaa.

Sareenip Ilagiinnit Lutherikkuusunit aninissaminik aarlerisaaruteqarsimanera piffissami qaninnermi nassuiagassaanut ilaaginnarpoq. Nittartakkami politikkimik sammisalimmi altinget.dk paasissutissiivoq, Sareenip kissaatigigaa oqaluffiit naalagaaffimmut attuumassuteqarunnaarnissaat kissaataasoq.

Manu Sareen altinget.dk'mut ilisimatitsivoq, oqaluffiup naalagaaffillu immikkoortinneqalernissaat isumaqatigilluinnarini.

Powered by Labrador CMS