Skip to main content

TV-2 Paamiunukassapput

Danmarkimiit rockertartut nunatsinni tusarnaartitsiartoqattaarnertik aallartillugu tallimanngorpat oktobarip 7-ani Inussivimmi tusarnaartitsissapput. Sapaatip akunnerata naanerani Paamiuniissapput Ilulissanilu naggataarlutik

Ukiut marlungajaat matuma siorna TV-2-kut nunatsinniipput. Maannakkut nunatsinnukaqqinniarput, tamannalu ukioq manna pissaaq nipilersoqatigiit ukiuni 30-nngortortiorlutik nalliuttorsiornerannut atatillugu. Nipilersoqatigiinnut 2011 pisoqarfiusimaqaaq. Februaarimi cd-liaat nutaaq "Sjowtime" saqqummerpoq, tassaalluni aamma nunatsinni tusarnaartitsineranni tunngaviussussaq. 

Aasaanerani Grøn Danmarkimi tusarnaartitseqattaarput, TV-2 Grøn Koncertimi tusarnaartitseqattaarnerminni nutaamik rekordiliilluni. Arfineq marloriarsimapput. Aasaanerani sumi tamani tusarnaartitsisarsimapput. Maannakkut aasaanerani pisussat naggaserneqarput, tamannalu nunatsinni pingasoriarluni tusarnaartitsinertaqassaaq. Novembarimi TV-2 naggataassapput, tamanna Londonimi pissaaq.  

TV-2 1988-mi nunatsinnik soqutigisaqalerpoq. Tamanna Kræftens Bekæmpelsenip nutaarnaartitsilluni katersuiniarnerani pivoq. Taamanikkut News aamma Danmarkimeersut peqatigalugit tusarnaartitsipput soorlu aamma Sumekkut peqatigalugit. Nunatsinnik soqutiginninnerat aallartippoq tusanaartitsinerallu malitserpassuaqarpoq. Danmarkimi nipilersoqatigiit qasunarnersaattut imminut taagajuttarput, ukiullu 23-it ingerlaneranni nunatsinni 18-19-iarlutik tusarnaartitsisarsimallutik.  

Tamatigut illoqarfik alla

Maannakkut Paamiuliarnerat iluatsippoq, TV-2-mi tassaniissimanngisaannarpoq. Paamiuliarniartarsimagaluarput, timmisartulli angallatillu angalanissaannut periarfissaqartarsimanngillat. Taamaattoq Arsuup eqqaani Kangilinnguaniiissimapput, tassalu taamaalillutik Paamiut qanillinerpaasimallugit. 

Piffissaq kingullerpaaq atorlugu Paamiulianiarneq iluatsippoq. Timersortarfimmi arfininngorpat oktobarip 8-ani tusarnaartitsissapput. Timmisartumik attartorlutik Paamiuliassapput sapaammilu oktobarip 9-ani Nuummut utissallutik. Ataasinngornermi oktobarip 10-ani Ilulissanut aallassapput marlunngornermi oktobarip 11-ani Hotel Arcticimi nipilersussallutik. 

Paamiunulli Ilulissanullu ingerlatinnarik tallimanngornermi oktobarip 7-ani Nuummi Inussivimmki tusarnaartitsersuaassapput. TV-2 nunatsinnukarnerminni nukittunerpaanik nipilersorteqassapput, tassalu Steffen Brandt makkununnga siuttuulluni Hans Erik Lerchenfeldt, George Olesen aamma Svend Gaul. Arnat ingiallortaasartut maannakkut peqataapput,The Århus Horns maannakkut peqataanngitsut.

Nuuk Shotokan Karate-Do Nuummi aaqqissuisuuvoq. Inussivimmi nipilersornissaarsuanut Qaammataasat aallarniissapput. 
 
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER