Narsami utoqqaat akerliussutsimik takutitsisut
Nunat tamalaat akornanni oktobarip aallaqqaataa utoqqarnut ulloritinneqarmat, Narsami utoqqaat peqatigiiffiat Arpaligaa nipangersimaannarsinnaanngilaq
Narsami utoqqaat naammagittaalliutigaat utoqqalinersiamik mangiarneqarat.
Illoqarfiup pisiniarfiini nerisassat pisiassallu akii ukioq qaangiuttoq akitsoriapiloorput. Assersuutigalugu kaffi poortap akia 34-koruuniniit 54 koruuneqalerpoq, utoqqalinersiaqartumullu kaffi pinngitsoorneqarsinnaanngingajappoq.
Kiassarnermut ikummatissiap akia aamma qaffappoq ukiullu nikinnissaani kommunip inissiaataasa akii 10 procentimik qaffaqqissapput.
Air Greenlandip angalatitsinermi akii aamma qaffannikuupput illoqarfimmiillu nunaqarfinnut angallatsitsineq atorunnaarnikuummat angalaniartut namminersortut umiarsuaaraat ilaatigut pisoqalinikooqisut, imaluunniit umiatsiat ammaannartut meeqqanik ernuttanillu tikeraassallutik ilaaffigisinnaagunikkit qutsatigiinnartariaqarpaat, tamakkuli angallatigissallugit 70-iniit 80 tungaanut ukioqarluni nuannerpallaanngillat.
Taamaattumik Narsami utoqqaat peqatigiiffiata Arpaligaa, kommunalbestyrelsimi ilaasortamik utoqqaat ulloqartinneqarnerani oqalugiaqqusigaluarput, naakka Kommune Kujallermi kommunalbestyrelsimi issiasut pingasut Narsaminngaanneeraluartut, arlaannaalluunniit piffissaqarsimanngilaq.
Utoqqaat nalunngilluarpaat kommuni aningaasameertoq, taamaattumik siunnersuutigaat akit qaffariartorneranut nalimmassaanertut utoqqalinersiat amerlinngikkaluarlugit, utoqqaat utoqqalinersiaqaannartut akileraarutaat 20 procentimik appartinneqassasoq.
Utoqqaat 20 missaanniittut tusaaqqusaarlutik allagartaliussatillu takuteqqusaarlugit illoqarfimmi angalaarput, ajornartorsiutiminnik paasineqarnissaq anguniarlugu.
Akit qaffariartoraluartut aammalu qinikkanit soqutiginninneq annermik takutinneqanngikkaluartoq taamaattoq arfininngornermi utoqqaat ullu ornittakkaminni Ippikasimmi nuannisarfigaat. Illup silataani qittallutillu erinarsortarput illup iluani kaffeqarlunilu tamussigassaqartoq.