Skip to main content

Pinngortitaq ilinniarfittut

Inuusuttut 15 aamma 18 akornanni ukiullit Piareersarfimmeersut ukiulersoq pinngortitami nutaanik unammilligassarsiussapput inuttut nukittorsarniarlutik aammalu Suliniummi Timi Asimi-mi nutaanik piginnaanngorsarniarlutik 

Nunatsinni Atuarfimmi Timersornerup inuusuttut peqqinnartumik inuunissaannut kiisalu ilinniagaqalernissaannut najoqqutassiorlugillu nukittorsassavai aammalu pinngortitarsuatsinni nalissaqanngitsumi unammilligassissallugit. Suliniut pissanganartoq nutaaq, Nunatsinni Atuarfimmi Timersornerup ingerlatissavaa, Kim Godtfredsen tusagassiorfinnut nalunaarummi allappoq. Suliniut taasimavaa Timi Asimi.

Suliniummi inuusuttut 15 aamma 18 akornanni ukiullit sammivagut meeqqat atuarfianni atuarnerminnik naammassinnissimanngitsut imaluunniit ilinniakkaminnik taamaatitsisimasut. Suliniutitsigut inuttut piginnaasaqarnertik nukittorsassavaat Piareersarfik Nuuk-mi ingerlaqqinniassagamik. Suliniummi Ikiueqqaarnermi, nalunnermik ilinniartitsisutut pikkorissarsimasutut kiisalu annaassiniartartutut pikkorissarsimasutut uppernarsaatitaassapput, minnerunngitsumillu timikkut assigiinngitsunik misiligartissallutik, Kim Godtfredsen paasissutissiivoq.

Atuartut tamarmik akunnerni 24-ini Ikiueqqaarnermik pikkorissarnermi angusereerpata inuusuttut sapaatit akunnerini marlunni Itinnerani pinngortitami unammillernartunik misigisaqartinneqassapput inuttut piginnaasaat ukiamilu nillertumi suleqatigiinnermik paasinninnerat nukittorsarneqassallutik, atuartut allat 15-it peqatigalugit.

Misiliutitut suliniut Timi Asimi Nunatsinni Atuarfimmi Timersornerup Nuummi Piareersarfik suleqatigalugu akisussaaffigaa. Oktobarip 3-anni aallassapput oktobarillu 14-ianni angerlassallutik.

Kangerlummi atuartut Itinnerani lejrskolimi najugaqassapput, tassani ullut tamarluinnaasa unammillernartunik suliassinneqartassallutik timersornermik misiliinermik, nunami arpallutik aamma orienteringsløb-erlutik, kiisalu holdit tamarmik annanniarnermi suliassinneqartassallutik. Tamatuma saniatigut ajornanngitsunik suliaqartassapput soorlu kammalaatiminnut pinngortitami nerisassiorlutik ikumasartumullu imermik qalaassillutik kiisalu aavarlutik kangerlummilu aalisarlutik.

Nunatsinni Atuarfimmi Timersornerup aamma Kapisilinni atuarfik attaveqarfigisimavaa, taamaasilluni Itinneraniinnermi kilometerit arfineq-pingasut marloriarluni-pingasoriarluni Kapisilinnut pisuttoqartassalluni atassani atuartut ikittut sammisaqaqatigisassallugit. Tamatuma saniatigut atuartut kapisilimmiunut pulaassaput pisariaqarpallu nunaqarfimmi saliinermi ikiuutissallutik.

Pinngortitaq ilinniarfittut

- Atuartitsinermi pinngortitalerinermilu pinngortitaq sammineqaleraluttuinnarpoq. Ilisimatusarnerup iliuutsillu takutissimavaat meeqqat inersimasullu, pinngortitami sammisaqartartut ulluinnarni ulapiffiusuni nuannaarnerusartut aammalu itisilerinermik eqqissimaarnermillu periarfissaqarlutik. Pinngortitami atuartitsineq perorsaanerlu ilinniartitsiffioqataapput misigisakkut iliuutsikkullu. Taamaasilluni ilinniagassarpassuarni pinngortitaq aalajangiisuusumik inissisimavoq, Kim Godtfredsen nassuiaavoq.

- Ilisimatusarnerup takutissimavaa pinngortitami anguniagalimmik sulinikkut meeqqat inuusuttullu inuulluataarnerulersartut, pissutigalugu piginnaaneqalernerusaramik atuarnermillu nuannarinninnerlutik. Pinngortitap ataqatigiinneranik misigisaqarneq takunninnerlu paasisaqartitsisarput, inuit pinngortitamik avatangiisinillu illersuinissamut kajungilersillugit, taanna isumaqarpoq.

Silami inuuneq

Silami inuuneq sorpassuartut paasineqarsinnaavoq, pinngortitamik peqateqarluni inuunermit timersornerpalaartumik unammillerpalaartumillu sammisaqarnernut.

Pinngortitamik peqateqarluni inuuneq pisarpoq pinngortitaq suleqatigalugu ataatsimooqatigalugulu atortussat annikinnerpaat atorlugit pinngortitap tunngavigititai atorluinnarlugit tamakkualu ataqqillugu.

Tamatuma saniatigut Itinnerani silami sammisat tassaassapput orienteringsløb, geocoaching, qaqqami pisuttuarneq il.il.

- Atortut silami inuunermik ikiuutaasut ineriartulipoorput. Nunatsinnilu Atuarfimmi Timersornerup qularutiginngilaa Kalaallit Nunaat periarfissarissaartorujussuusoq unammilliagassat nalissaqanngitsut tamakkua atorluarnissaannut, Kim Godtfredsen oqarpoq.

Suliniummi tamarmi timersorneq ilaavoq

Timersornerup atortui pitsaanerpaat atuartullu timersornermik paasitinnissaat suliniummi ilaapput, tamatumani pinngortitaq, peqqissuseq silamilu inuuneq atuartut timiminnik atuinissaannut ineriartornissaannullu aallaaviullutik.

- Asimiinnermi assigiinngitsunik ilitsersuisoqassaaq timersornermik, pinngortitamik suleqatigiinnermillu misilittagaqarluartunik, Kim Godtfredsen paasissutissiivoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER