Skip to main content

Greenpeace: Pilersaarut atorsinnaanngilluinnarpoq

Kalaallit Nunaanni uuliamik mingutsitsisoqaraluarpat 10 imaluunniit 20 procentiinnaa katersorneqarsinnaassaaq, Greenpeace taamatut allappoq

Aasaq Cairn-ip Kalaallit Nunaata avataani uuliasiorluni qillereqattaarnerani ulorianartoqarsinnaasuni, Greenpeace-miit akerliussutsimik takutitsiniaqataasut 20-t tallimanngormat eqqartuussivimmit pineqaatissinneqarput.  

- Greenpeace-muli suliniaqatigiit pineqaatissinneqarnersut apeqqutaanngilaq. Akerliussutsimik takutitsiniarnerup iluatsinnera pingaarnersaavoq. 

Jon Burgwald, Greenpeace-meersoq bloggimini taamatut allappoq.

...Suliniaqatigiit qillerinernik ulluni arlalinni unitsitsipput Cairn-illu qillereqattaarnermini upalungaarsimanermi pilersaarutiminik saqqummiinissaanik kimigiiserfigalutigu. Upalungaarsimanermi pilersaarut tassaavoq, ajutoortoqassangaluarpat uuliamiluunniit mingutsitsisoqassangaluarpat saliiniarnermi suleriusissat pilersaarusiornerat, taannalu Issittumi Isumasioqatigiit malittarisassaannik unioqqutitsillutik ukioq ataaseq sinnerlugu isertuunniarsimavaat. 

Qaammatip ataatsip matuma siorna - Greenpeace-meersut akerliussutsimik takutitsereersut - pilersaarutit Naalakkersuisunit tamanut saqqummiummassuk tkuneqarsinnaalerpoq, Cairn-ip Kalaallit Nunaanni avatangiisit mingutsinnewqarnissaaq qanoq aarlerinartiginersoq. Uangalu eqqoriakkattut naammaginanngitsumik aarlerinartoqaqaaq.

Upalungaarsimanermi pilersaarut naapertorlugu uuliamik mingutsitsisoqarpat 10-20 procentiinnaata piiarsinnaanera Cairn-ip naatsorsuutigaa. Uuliap sinnerata ikuallanneqanngikkuni kemikalianik akoorlugu arrortinneqarnissaa naatsorsuutigineqarpoq - periutsillu taakkua marluk Issittumi sukumiisumik atorneqarsinnaanngillat namminnerlu ulorianareerlutik. Pilersaatut amigaateqangaarami atorneqarsinnaanngilaq. 

Issittumi avatangiiseq sunerneqajasuararsuuvoq, issinneralu pissutaalluni uulia ukiuni qulikkaani arlalini imaaniittuarsinnaalluni. Taamaammat Issittumi saliinisssamut pilersaarut naapertorlugu uuliamik mingutsitsisoqarpat saliisoqarsinnaanissaa pingaaruteqartupilussuuvoq - Cairn-illu pilersaarusiaa naapertorlugu sukumiisumik saliisoqarsinnaanngilaq. 

Naliliisoqareeraluartoq suli aalajangivissortoqanngilaq. Cairn-ip uuliasiorluni qillereqattaarnerani uuliamik mingutsitserujussuartoqarsinnaanera qanoq aarlerinartigisoq kikkunnit tamanit nalilersorneqarsinnaalerpoq, sulili uuliasiorfiutileqatigiiffik naammagittaaqaluni uuliasiortuarsinnarpoq. 

Sulilu aappaagu aamma qillerissamaarluni. Greenpeace-miit soorunami qillerinerit unitsinniartuassavagut. Uuliasiorfiit qillerinissaat akuersissutigitinnagu - Kalaallit Nunaannilu avatangiisit aalisarnerullu innarlerneqarsinnaanerat taama aarlerinartigitillugu, Naalakkersuisut eqqarsarluaqqaarnissaat neriuutigaara.  

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER