Kalaallit meerartaat oqartussanit sumiginnarneqarput
Peqatigiiffiup Grønlandske Børn-ip uteriiserfigimmatik qallunaat politikeriisa kalaallit meerartaat Danmarkimi najugallit aatsaat isumaginiarsarilerpaat
Kalaallit Nunaanni inunnik isumaginnittoqarfiup aaqqissunnerlugaanerujussua pissutaanerarlugu, Nunatsinni kalaallit meerartaat sumiginnarneqartartut allaallu pikattarneqartartut, qallunaat politikeriisa tusagassiuutitigut amiilaarnartunik qangali eqqartortarpaat.
Danmarkimili oqartussat aamma kalaallinik ilaqutariinnik Danmarkimi najugalinnik annertuumik atugarliortunik ikiuimaartarnerujussuat, nalunaarusiami nutaami atuarneqarsinnaavoq.
Tamanna dr.dk-mi allaaserineqarpoq, ullumi aamma kalaallit Danmarkimi najugallit meeraasa sumiginnagaanerat pillugu piviusulersaarut, DR-ikkut aallakaatinneqarpoq. Taanna P1 Dokumentar-imi Danmarkimi nalunaaqutaq naapertorlugu, 14.00 aallakaatinneqarpoq.
Kalaallit meerartaat 80-it suliarisami peqataasut najugaanni inunnik isumaginnittoqarfiit nalunaarsugaannut ilaanngikkaluartut piaartumik takuneqarsinnaalerpoq, meeqqat arlalippassuit ima atugarliortigisut, allaat peqatigiiffimmiit kommunimut suliassanngortitsisariaqarsimallutik.
Suliarisap ukiuni sisamani ingerlannerani, suleqataasut 89-eriarlutik kommuninut allakkatigut nalunaarutiginnittariaqartarsimapput.
Tamatuma kinguneranik meeqqat 61-it angerlarsimaffitik qimallugit inissinneqartariaqarsimapput. Taamatut dr.dk-mi allaaserinnittoqarpoq.
Aallakaatitassiaq ullumi septembarip 29-anni P1-imi Nunatsinni nalunaaqutaq 10.00 aallakaatinneqarpoq, oktobarillu aallaqqaataani Nunatsinni nalunaaqutaq 11.00 aallakaatinneqaqqissalluni.
kingumullu oktobarip aappaanni Nunatsinni nalunaaqutaq 16.00 aallakaatinneqaqqissalluni.
Aallakaatitaq pillugu sukumiinerusumik uani atuagaqarsinnaavutit HER