Ilulissani timmisartortitseqatigiiffik nutaaq
Timmisartortitseqatigiiffik nutaaq ateqarpoq Air-Zafari, aasami qaangiuttumik nipangiusimallugu Ilulissani timmisartumik takornariartitsisarsimasoq. Tamanna takuneqarsinnaavoq atuagassiami Travel People-mi kingullermik saqqummersumi allaaserisami
Air-Zafari-mik piginnittuuvoq Bente Biilmann Larsen (43-nik ukiulik), timmisartortartutut ilinniagaqarsimasoq, ulluinnarnilu Air Greenlandimi timmisartortartuusoq selskabip timmisartuanik Dash-7-imik. Uia, timmisartup naalagaa Jens Ploug Larsen (46-nik ukiulik), aamma Air Greenlandimi Dash-7-imik timmisartortartuuvoq. Tamatuma saniatigut Air-Zafari-mi nuliamiut siunnersortaavoq.
Selskabi nutaaq ataasiinnarmik timmisartoqarpoq, Roskildemi Copenhagen Air Taxi-mit pisiarineqarsimasumik. CAT aamma timmisartortartumik atukkiisimavoq. Taanna ateqarpoq Peter Fusager, 26-inillu ukioqarluni.
Bente Travel People-mut oqaluttuarpoq Ilulissani timmisartumik takornariarluni timmisartornissaq ima soqutigineqartigisoq, aappaagu timmisartuunni ataatsimik ilaqqinnissaa siunniukkini. Timmisartoq pisiarineqassanersoq attartuinnarneqassanersorluunniit suli aalajangerneqanngilaq.
Timmisartoq ukiunik 32-inik pisoqaassusilik
Timmisartoq aasaq manna atorneqarsimasoq tassaavoq Parte Vavia, type P68, 1979-imilu sananeqarsimalluni.
Air Zafari aamma Copenhagen Air Taxi isumaqatigiissuteqarsimapput Kalaallit Nunaanni timmisartuussinermi CAT-ip akuersissutaa, AOC-mik taaneqartartoq, atorneqassasoq, tamatumalu kinguneraa timmisartuussinerit, aserfallatsaaliineq il.il. CAT-p akisussaaffigai.
- Timmisartoq ukiuni 32-inik pisoqaassuseqaraluartoq nutaarluinnartut ippoq, Bente nassuiaavoq.
- Pinissamisut misissorneqarnissani tamaasa atorsimavai, timmisartullu atortuisa ilaat taarserneqarsimapput, akunnerit timmisartornermi atorneqarfissaat malillugu. Taamaattumik qallunaat silaannakkut angallannermi oqartussaasuisa nunatsinni atorneqarnissaanik akuerinissaa ajornakusoortissimanngilaat, taanna Travel Peoplemut oqarpoq.
Pisoq pitsaasoq
Air Greenland aasaq Ilulissani helikopterimik uninngasuuteqarsimagaluartoq Air Greenlandip pisortaata Michael Binzerip Air-Zafari-p ingerlatsinera unammillernertut isiginngilaa:
- Kalaallit Nunaanni takornarianik ingerlatsinerit tamaasa pitsaasutut isigaavut, taanna Travel Peoplemut oqarpoq.