Skip to main content

Meeqqat nunatsinneersut tusaaneqarusupput!

Meeqqat ataatsimeersuartinneqarnissaanni Nakuusa Youth Forum meeqqat pitsaasumik meeraaneq pillugu tusarniaaffigineqassapput

Meeqqat 13-15 akornanni ukiullit 20-jugaangata ataaseq meeqqat ataatsimeersuartinneqarnissaanut Nakuusa Youth Forum'imut peqataaniarluni nalunaartarpoq Ilaqutariinnermut, Kulturimut, Oqaluffinnut Naligiissitaanermullu pisortaqarfik tusagassiivinnut nalunaaruteqarpoq nangillunilu:

Inuusuttut nukittuut 40-t najugaqarfinnit assigiinngitsorujussuarneersut assigiinngitsunillu tunuliaqutallit Kalaallit Nunaanni siullerpaamik meeqqat ataatsimeersuartinneqarnissaannut peqataajumasut toqqarneqarput. 

Nakuusa Youth Forum ingerlanneqarnerani meeqqat pitsaasumik meeraaneq pillugu tusarniaaffigineqassapput. Tamatuma saniatigut Kalaallit Nunaanni meeqqat inuusuttullu pisinnaatitaaffiisa nukittorsarneqarnissaat pillugu peqataanissaannut piareersarneqassapput. 

UNICEF Danmark aamma Kalaallit Nunaanni Namminersorlutik Oqartussat Nakuusamik aallarniisuupput. 

Sikkerninnguaq Olsen, 14-inik ukiulik Upernavimmeersoq peqataasussatut toqqakkat ilagaat taanna nuannaarpoq pileralunilu:
- Meeqqat 40-t akornanni toqqagaallunga tusarakku upperinngikkaluarpara. Inunnik nutaanik naapitsinissara qilanaaraara oqariartuutigerusutamalu apuunnissaa tusarneqarnissaalu neriuutigaara, Sikkerninnguaq Olsen oqarpoq.

Youth Forum'imut peqataaniarlutik qinnuteqartut 149-t assigaa meeqqat 13-iniit 15-illu akornanni ukiullit 20-jugaangata ataaseq qinnuteqarsimasoq.

- Tupaallannaqaaq nuannaajallannaqalunilu taama amerlatigisut qinnuteqarnerisa ersersippaa Kalaallit Nunaanni meeqqat inuusuttullu soqutigisorujussuugaat nunatsinni meeraaneq pitsaasoq suunersoq qanorlu anguneqarsinnaanersoq, Steen M. Andersen, UNICEF Danmarkimi allattaaneq oqarpoq.

- Nuna tamakkerluinnarlugu qinnuteqartoqarsimanera nuannaajallannarpoq - illoqarfinnit nunaqarfinnit, avannaanit kujataanit, kangianit kitaanillu, Mimi Karlsen, Ilaqutariinnut, kulturimut, oqaluffinnut naligiissitaanermullu naalakkersuisoq oqarpoq.

Nakuusa Youth Forum'imi peqataasut pisinnaatitaaffimmik suuneranik qanorlu tusaaneqarnerunissamik ilitsersuunneqassapput. Qanoq ilillutik suliniutinik najugaqarfimminni tusaaneqarnerunissaq anguniarlugu aallartitsisinnaanermik ilitsersuunneqassapput.

Nakuusa Youth Forum, sap. ak. 42 Ilulissani ingerlanneqassaaq, aaqqissuussineq Bikubenfonden aamma Dronning Margrethes og Prins Henriks Fondimit taperneqarpoq.

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER