Issittumi ineriartorneq

Norgemi sulisut kattuffissui issittumi suliffeqarfinnut ulluni makkunani Nuummi Hotel Hans Egedemut aggersaapput

Kalaallit Nunaanni tunisassiortunngortussatut ineriartornera aallaavigalugu, norskit sulinermik kattuffissui Hotel Hans Egedemut aggersaapput. III London Mining

Norgemi sulisut kattuffiisa annersaat Fagforbundet, Nuummi issittumi sannaviit pingasunik taasamik septembarip 26-anniit 29-at ilanngullugu aaqqissussivoq, taama Fagforbundet tusagassiutinut nalunaaruteqarpoq, soqutiginnittut peqataanissaannut qaaqqusiitigaluni.

Sannaviit siunertaraat tunisassiornikkut inooqatigiinnerullu Kalaallit Nunaanni ineriartornerisa ersersinniarneqarnerat.

Issittumi innuttaasut nunap pissarititaasa tunisassiarineqarnissaannik soqutiginnittut amerliartuinnarnerat malugaat. Nunarsuarmi tunisassiassat ikinnerat silallu pissusaata allanngoriartorneranik kinguneqartumik ineriartorneq taama ingerlavoq. Issittumi sumiiffinni assigiinngitsorpassuarni misissueqqaarnerit tunisassiorfiliornerillu ingerlanneqarput. Sumiiffinni allani pilersaaruteqarpoq suliffeqarfissuarnillu pilersitsinissaq neriulluarfigineqarpoq. Nunani arlalinni Issittumiittuni avataanilumi, issittumi avannarpasissumilu qanoq iliuusissanik pilersaarusiortoqareerpoq. Tamakku ataatsimoorussaraat aammalu inuiaqatigiit oqallinneranni nukissiorneq- aamma aatsitassanik isumalluutit isiginiarneqartorujussuupput soorlu silap pissusaata allanngoriartornera, umiarsuit aqqutigisinnaasaat nutaat nunallu pissusaanut tunngasut. Inuit inuiaqatigiillu Issittumiittut isiginiarneqarneri annikinneroqaaq.

Norgemi Fagforbundep pisortani namminersortunilu sulisut 320 000 ilaasortarai. Forbundi avannarpasissoq pillugu qanoq iliuusissamik politikkeqarpoq, avannaani inuit inuiaqatigiillu isiginiarnerullugit imalimmik. Norgep avannaani sumiiffippassuarni inuiaqatigiit unammisassaat angeqaat.

Ilaatigut tassaapput allanut nussorneq, ilinniarfinni ingerlaqqiffiusuni taamaatiinnartartut suliassaqarfinnut nalinginnaasunut sulilerusussinnaasunik amigaateqarneq, tamakkununnga aningaasaqarnerup kulturillu napaannarnissaanut tunngaviusunut. Issittumi avannaanilu inuussutissarsiornermi aningaasatigut ineriartornissaq periarfissaqarpoq. Isumaqanngilagulli suliffeqarfissuarnik pilersitsinerni sulisinnaasut nunaqavissut ersinngitsumit ikiorneqartut. Politikkikkut taamanna unammilligassaavoq pitsaasumik periaaseqarnikkut aammalu aqqut suna toqqassanerlugu ilisimallugu.

Ilisimavarput Issittumi inuiaqatigiinni tamalaani oqallinnerit taamaattut ingerlanneqartartut. Taamaattumik upperaarput nunat killeqarfiit akimorlugit tamakku oqallisiginerat iluaqqutaasoq - Issittumi inuit akornanni, inuiaqatigiinni suliniaqatigiiffinnilu. Ineriartornermut peqataanerorusuppugut inuit inuiaqatigiillu norgep avannaaniittut oqallinnerat annertunerulersikkusupparput. Ineriartorneq pillugu ilisimasaqarnerorusuppugut, issittunilu nunat allat akornanni attaveqarusuppugut oqaloqatigisassarsiorlutalu.

Issittumi sannaviit nunatsinnit norgemilu politikkikkut inuiaqataanermiillu ilaqartinneqarput. Neriuppugut issittumi periarfissat unammisassallu pillugit sannaviit pitsaasunik oqaloqatigiinnernik oqallinnernillu pilersitsiumaartut. Norgep avannaanit Fagforbundip immikkoortortaqarfianit allaffimmiunillu peqataasoqarpoq. Tamatuma saniatigut norgemi suleqatit suliniaqatigiiffiillu attuumassutillit sannavinni peqataapput.

Makku sammineqassapput:

• Kalaallit Nunaata oqaluttuassartaa, politikki aamma inuiaqatigiit

• Piniartuunermiit nuna tunisassiorfissuaq?

• Atugarissaarneq inooqatigiinnermilu ineriartorneq

Powered by Labrador CMS