Skip to main content

Arfiviit imarpiit marluk akornanni aqqutissiuussisuupput

Manerassuarmi Atlantikumilu uumassusilinnut imarpiit marluk akornanni atteqarneq annertuumik sunniuteqassaaq, qanormi issagaluarpa Manerassuup saarullia Kalaallit Nunaata kitaanut pissagaluarpat, Mads Peter Heide-Jørgensen allappoq 

Ukiut 4.000-t matuma siorna arfiviit akornitissaqaratik asaanerani Kalaallit Nunaata Alaskallu akornanni ingerlaarsinnaasimapput. Tamanna peqquteqarpoq Canadap avannaani Sullualuk taamanikkut aasaanerani sikoqartarsimanngimmat. Ukiuni kingullerni Issittumi silaannap allanngoriartornera tikillugu isumaqartoqartarsimavoq sikoqarnerujussuatigut arfiviit Atlantikup Manerassuullu akornanni angalanissaat ajornarsimasoq. Ilisimatusarnerilli nutaat Biology Lettersimi saqqummersinneqaqqammersut takutippaat arferit ukiuni kingullerni sikukitsillugu Sullualukkoortartut, arfiviillu Alaskameersut Kalaallillu Nunaanneersut Canadap avannaata qeqqani naapissinnaallutik. 

2000-miilli Pinngortitaleriffimmit Qeqertarsuup tunuani arfiviit 130-init ikinngunngitsut nalunaaqutsersimavaat qaammataasanut nassiussissutinik Alaskamilu aalisarnermut piniarnermullu naalakkersuisoqarfik suleqatigalugu Alaskami arferit 58-it nalunaaqutsersimallugit. Arferit arlallit Sullualukkoornissatik soqutigaat, septembarimilu 2010-mi arfeq ataaseq nunatsinneeroq arfivillu Alaskameersoq ataatseq imminnut naapipput sapaatillu akunnerini marlussunni peqatigiillutik najugannaaminnut uternissamik tungaanut. 

2010-mi Sullualuk sikukitsupilussuuvoq arferillu akimmisaarfeqaratik ingerlaarsinnaallutik. Ukiuni kingullermi 20-ni Issittup annersaani siku aakkiartupiloorsimavoq, inuillu ikittuinnaat Sullualukkit angalasarmata ilimanerpoq arferit amerlanerusut Alaska Kalaallillu Nunaata akornanni ingerlaartarsimassasut. Kalaallit Nunaanni Canadallu kangiani arfiviit amerlerujussuarsimanerat aamma nassuiarneqarsinnaavoq Alaskamiit takkussuuttoqartarsimanera, amerliartupiloornerammi taamaallaat kinguaassiornikkut pisimanagianngilaq.  

Arfiviit sumiiffimmi tassani ingerlaartarnerat namminermi immaqa tupinnanngikkaluarpoq, uumassusillillu allarpassuarnut, Manerassuarmi Atlantikumilu uumassusillit imminnut attaveqarsinaanerat annertuumik sunniuteqarsinnaavoq. Atlantikumi Maneruassuup plantonii takuneqartalereersimapput, arferillu ilaat taamaallaat Manerassuarmiittartut aamma Atlantikumi takuneqartarlutik. Manerassuullu saarullia nunatta eqqaaniililernissaa sunniuteqarluassajunnarsivoq.  
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER