Brugsenimi ilinniarumasut amerliartuinnarput

Uani sapaatip akunnerani Kalaallit Nunaanni Brugsenimi ilinniartut nutaat 21-t Nuummi katersuupput niuerfarfiutillip takorluugai anguniagaalu paasisaqarfiginiarlugit, KNB tusagassiuutitigut nalunaarummi allappoq

De nye 21 KNB- elever har i sidste uge været samlet i Nuuk, for at få indblik i butikskædens mange muligheder. Foto: KNB

- Neqilerisutut ilinnniartunngornialerama, Brugseni ilinniarfissatut toqqarpara, nalunnginnakku neqileriffia Kalaallit Nunaani annerpaasoq suliaalu tamatigoortuusut, Aputsiaq Søholm Lennert 21-nik ukioqatoq oqarpoq.

Brugsenip pisiniarfiini qullersaqarfianilu ilinniartut 45-iisut Aputsiaq ilagaat. Ilinniartut aallarterlaat Nuummi katersuupput, ingerlatseqatigiiffiup periarfissai tipisiorlugit.

Sulisut ilinniaqqinnerat pikkorissarnerallu Brugsenimi ukiuni makkunani annertuumik aallunneqarpoq – inuusuttullu ilinniarnerat nunatsinni tamakkiisumik pigineqartup suliffiup suliniutimini salliutippai. HR-imi pisortaq Carsten Olsen oqarpoq, ilinniartut 2004-imiit marluinnaasut ullumikkut 45-inngorsimammata, tamanna anguniagaq kinguneqarluarsimasoq.

- Brugsenimi sulisuuneq orniginarnerulerpoq. Tassami inuusuttunut siullertut toqqarneqartalersimavugut, qaffannissamut ilinniaqqinnissamillu suliffimmi periarfissarissaaratta, HR-imi pisortaq oqarpoq.

Tassami pisiniarfiutileqatigiiffimi ilinniartutut aallartissimasoq ullumikkut pisiniarfiit ilaanni pisortaavoq uddeleriulluni. Ilinniartut nutaat pisiniarfiutileqatigiiffiup periarfissaanik ilisimatinneqaannaratik, aamma paasitinneqartarput, pisisartunut inuiaqatigiinnullu malunnaatilimmik suliumasumut suliffimmi qanoq pingaartigisut.

Ilinniarnermik pikkorissaanermillu annertuumik sammimsaqarnerup kinguneranik sulisut tikisinneqartartut ikiliartorput. Sulisut 450-iusut 95 procentii ullumikkut nunaqavissuupput.

Brugsenimi ilinniarfissat arfiniliupput, pisiniarfimmi asistentimiit mediegrafikerimut, KNB allappoq.

Powered by Labrador CMS