Skip to main content

Mingutsitsisoq akiliissaaq

Anthon Frederiksenip avatangiisinut inatsisit kattullugit ataasiinnaanngortinniarpai

Ukiuni makkunani avatangiisit sammineqarluarput inatsisilli malinnaatinneqarsimanatik. Pinngortitamut avatangiisinulluo Naalakkersuisup Anthon Frederiksenip  Kattusseqatigiit Partiianneersup marlunngorpat ualikkut avatangiisit illersorneqarnissaanut inatsisissaq saqqummiutissavaa, taannalu ilaatigut malerugassatoqqat avatangiisillu illersorneqarnissaannut piumasaqaatit nutarneqarsimasup kattunneruaat.  

Nunatsinni avatangiisit illersorneqarnissaannut peqqussutit siulliit 1988-meersuupput, taakkulu suliarineqarnerminni Danmarkimi avatangiisit illersorneqarnissaannut inatsit 1974-meersoq tunngavigaat. 1988-miit nunatsinni peqqussut sisamariarluni allanngortinneqartarsimavoq, kingullermik 2007-mi. Avatangiisinut tunngatillu inatsisit ersarinneruleqqullugit ullumikkut peqqussutit tallimat oqaaseqaasitallu kattunneqassapput ataasiinnanngorlugit. 

Malegasassat kattunneqartussaammata Anthon Frederiksenip ullumikkut periutsit aalajangersakkallu nutaat ilanngussimavai, taamaalilluni inatsisit ullutsinnut  nunallu tamat akornanni pisussaaffinnut nunatta akuussigisaanut naleqqunnerullutik. 

Avatangiisit pillugit inatsimmi nutaami erseqqissarneqarpoq avatangiisinut tunngatillugu tunngaviit akuerisaasut aamma nunatsinni atuuttuusut. Periuseq BAT (teknikki pigineqartoq pitsaanerpaaq) atorlugu suliffeqarfiit mungitsitsinerpaat mingutsitsinermik killilersimaarnissaanut pisussaaffilerput teknikki pitsaanerpaaq pigineqartoq atorlugu. Periuseq "Mingutsitsisoq akiliissaaq" nunatta karsianut akiliinissaq piumasarineqarsinnaavoq nutaanik maleruagassiortoqartillugu, avatangiisinut akuersissummik qinnuteqartoqartillugu eqqagassalerinermilu aningaasartuutit akilerneqassatillugit. Taamaalilluni avatangiisinut inatsit nutaaq inuutissarsiornikkut suliffeqarfinnut aningaasatigut sunniuteqarnerpaassaaq. 

Piffissami kingullermi avammut saqqummiinerit, tusarniaanerit sivikippallaamillu piffissaniinerit sammineqarput, ingammik uuliasiornerup aatsitassarsiornerullu iluani, avatangiisinullu inatsit nutaaq nalunaarummik malitseqassaaq, tassani avatangiisinut tunngatillugu apeqqutini inuiaqatigiit akuutinnissaannut maleruagassiortoqarluni. 

Avatangiisinut inatsit nutaaq nunamut tunngasuuvoq, taamaattoq Pituffimmi amerikamiut sakkutooqarfiani atuunnani. Avataqngiisinut inatsit aamma aatsitassarsiortunut mingutsitsinerpaanut atuutissanngilaq, naalakkersuisulli siulittaasuata Kuupik Kleistip ammaanersiorluni oqalugiarnermini tamannarpiaq avatangiisinik illersuiniaqatigiinnit isornartorsiorneqaqisoq eqqartorpaa, oqarluni 'avatangiisinut tunngatillugu akisussaaffiup maannakkut aatsitassanut pisortaqarfimmiittup  nunamut namminermut, pinngortitamut avatangiisinullu naalakkersuisoqarfimmut nuunneqarnissaa sulissutigilerparput'. 

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER