Pallep aningaasat atorluarusuppai
Ilinniakkanut nunatsinni suliffeqalersitsisussanut aamaallat SU-mik pissarsisoqarsinnaassaaq
Uuliasiornerup aatsitassarsiornerullu iluani suliffissarpassuarnut ilinniarluarsimasuunissaq pisariaqarpoq, ilinniartitaanermullu naalakkersuisup Palle Christiansen Demokraatineersup marlunngorpat ualikkut ilinniarnermusiaqarnermut inatsit nutaaq saqqummiusissavaa, ilinniartitaanernut nunatsinni inuutissarsiutinut nutaanut aqqutissiuussisussat.
Ilinniartut pitsaasumik ingerlatinniaraanni ilinniarnermusiaqarnissamut maleruagassat imaattariaqarput ilinniakkat naalakkersuisunit nukittorsagassatut isigineqartut sallitinniarneqarlutik. Palle Christiansenip oqaaseqatigiit "ilinniarneq suliffissaqarnissamut tunngasoq" atorpai, inatsisissatullu siunnersuummi marloriarluni allanneqarsimavoq ilinniarniagaq akuerineqassappat ilinniartup ilinniareeruni nunatsinni suliffissaqarnissaa aallaaviusariaqartoq. Taamaattumik Naalakkersuisut inatsisit nutaat atorlugit ilinniarniakkat siunissami akuerinissaannut ilinniarnermut potilikki, suliffeqarnermut aningaasaqarnermullu tunngasut isiginiarsinnaavaat.
Maannakkut ilinniagaqarnermut tapissutinut inatsit 2004-meersuuvoq, taamaallaallu akuerineqarneraniit ukiut arfineq marluinnaagaluartut naalakkersuisut ilinniartitaanikkut anguniagaannut naapertuutinngilaq nunatsinnilu ilinniartitaanerup qaffassarnissaanik aningaasaqarnermut siunenrsuisooqatigiit kiisalu akileraartarnermut atugarissaarnermullu isumalioqatigiissitap innersuussutaannut. Inatsimmi nutaami naalakkersuisut Inatsisartut suleqatiseraat ilinniarnerumusianik tunniussinermi tunngaviusussat oqaasertalernissaannut, ilinniarnermusiammi nunatsinni inuiaqatigiinni pisariaqartitsinermik aallaaveqartariaqarput: Nunatta karsiata imarisai killeqarput, inuiaqatigiinnilu ikaarsaariartortuni kikkut SU-mik pissarsissappat kikkullu pissarsissanngillat?
Inatsisissatut siunnersuummi ilinniarnermusiat aningaasartalerneqarsimanngillat, naalakkersuisullu ilinniarnermusiat qanoq qaffasitsiginissaat suli aalajangertussaavaat. Inatsisissatulli siunnersuummi kalaallit ilinniagaqartut Danmarkimi SU-mik pissarsisartut ukiumoortumik nunatsinnut angalasinnaanerannik aalajangiineq suli ilaavoq. L
2012-mut aningaasanut inatsisissatut Naalakkersuisut siunnersuutaanni ilinniartitaanermut 193 million koruunit immikkoortinneqarsimapput ilinniartullu 3.521-it meeraannut tapit.