TV2 Nuummi tusarnaartitsissapput

Iluatsilluartumik upernaaq aasarlu Danmarkimi festivalini assigiinngitsuni tusarnaartitseqattaareerlutik TV2-kut Nuummut tikeqqissapput, "Puisit, arferit seqinerlu" erinarsuutiginiarlugit. Nuummi tusarnaartitsinerat pissaaq tallimanngornermi oktobarip 7-ani Inussivimmi, kingumullu Nuuk Shotokan Karate-do aaqqissuisuuvoq.

TV2 qangalili nunatsini tusarnaartitsisarpoq, kingullermik ukiut marluk matuma siornagut.

Nunatsinni nipilersoqatigiit nutaat Qaammataasat Steffen Brandtimut peqataanullu kissasaasuussapput. Nipilersoqatigiit taakku tamarmik cd-mik saqqummersitsipput, TV"-p cd "Showtime" saqqummersillugu, februaarimi saqqummersoq, Qaammataasallu cd-liaqqartik septembarip 15-ani saqqummersillugu.

Nuuk Shotokan Karate-do 2006-mi aamma TV2-kut tusarnaartitsinerannik aaqqissuisuuvoq, taamanikkut klubbip illutaarnissaanut aningaasassarsiorlutik.

Nuuk Shotokan Karate Do aamma maannakkut tusarnaartitsinissamik aaqqissuussisuupput, tassanilu siunertaavoq meeqqanut inuusuttunullu suliniutit aningaasassaqartinnissaat.

Aaqqissuussinermi suliassat tamarmik piumassutsimik sulisunit ingerlanneqassapput.

Taakkunani amerlanersaapput klubbimi inuusuttut, angajoqqaavi inuillu allat illoqarfimmiuusut, Nuuk Shotokan Karate-do-p meeqqanut inuusuttunullu suliniuteqarnerannik soqutinnittut.

Tusarnaartitsinissamut bilitsit ukunani pisiarineqarsinnaapput Pisiffik, Spar, NotaBene, Natalie, GRC, Stark aamma Brugsen. Tusarnaartitsinermut isissagaanni 15-iliisoqarsimasariaqarpoq, 15-18-inut ukiullit inersimasunik peqateqartariaqarlutik.