Andersine Hansen Kristiansen, Inatsisartuni
Doris Jakobsen Inatsisartunit sulinngiffeqarnissaminik qinnuteqarpoq, sinniisussaraa Andersine Hansen Kristiansen
Andersine Hansen Kristiansen Tasiilameersoq, Siumut sinnerlugu Inatsisartunut ilaasortanngorpoq.
Taassuma Doris Jakobsen taarsissavaa, Folketingimi suliassani isumaginiarlugit inatsisartut ukiaanerani ataatsimiinneranit sulinngiffeqarniarluni qinnuteqartoq. Folketingi oktobarip sisamaanni ammaanersiussaaq.
Ulluni makkunani Doris Jakobsen Christiansborgimi allaffissani aaqqissuutileruttorpaa, tamatuma saniatigut ataatsimiititaliat peqataaffigisassani pillugit isumaqatiginninniarpoq aammalu atlantikup avannaamiuisa gruppianik nutaamik pilersitsiniaqataalluni.
Siumut nittartagaanni allassimagaluarpoq Bitten Høegh Dam, Siumut inatsisartuni gruppiani sinniisussat aapparigaat.
Kisianni 2009-mi qinersinermi Bitten Høegh Dam 104-nit qinerneqarpoq, Andersine Hansen Kristiansen 106-init qinerneqartoq.
Sinniisussat siullersaat tassaavoq Jens Immanuelsen, Upernavik taassuma Per Berthelsenip napparsimalluni sulinngiffeqartoq taarserpaa.