Skip to main content

Akisuaneq Festival 2011

Akisuanerit Festival 2011 ataatsikkoortillugu illoqarfinni pingasuni ingerlanneqassaaq; Nuummi, Ilulissani aamma Qaqortumi tallimanngorneq septembarip 30-at aamma arfininngorneq oktobarip aallaqqaataat. Taama Atlantic Music tusagassiorfinnut nalunaaruteqarpoq.

Festivali sapaammi oktobarip aappaani Kalaallit Nunaanni Kodap erinniortunut nipilersortartunullu nersornaatinik tunniussineranik naggaserneqassaaq. Nersornaatinut pingasunut nersornaasigassatut piukkussat qulingiluaapput.

Nipilersoqatigiit erinarsortartullu ilisimaneqareersut soorlu Nanook, Sussat, Juaaka aamma Mariina saniatigut, ukioq manna Akisuanerit Festivaleqarnerata nalaani nipilersoqatigiit nutaat soqutiginartullu Kalaallit Nunaanni nipilersornerup silarsuaani ukiorpassuarni tulliuttuni tusarsaalerumaartussat tusarnaarneqarsinnaassasut, Atlantic Music paasissutissiivoq.

Nipilersoqatigiit Kishima Henrik Høyer Jensen erinarsortoralugu nuussiorput, erinarsortartup erinaa pikkunartoq namminiussuseqartorlu piukkunnarsisitseqaluni. Nuuteeraq qaammatip naalernerani saqqummissaaq, maannali erinnat ilaat radiomi tusarsaalereernikuupput. Erinnat saqqummersinneqartussat inuusuttunut utoqqaanerusunullu naleqquttuusut, Atlantic Music nalunaaruteqarpoq. 

Rikka tassaavoq eqqumiitsuliortoq piukkunnarluartoq erinagissorujussuaq amerlasuunit suli tusarneqanngitsoq. Taanna aamma novembarimi nuuteeqqamik saqqummersitsissaaq. Taanna Akisuanerit Festivali ingerlanneqalerpat tupaallatsitsisussat annersarissagunarpaat. Nipilersugai kusanarput erinageqalunilu.

- Inuit tusarnaariassamaartut festivalimut takkutijaarnissat sakkortuumik kajumissaarutigaara, taanna erinarsortartoq nipilersortoqarluni appisimaalerpat tusaaniassammassuk, Marianne Elsner Atlantic Music'imit tusagassiorfinnut allappoq.

Qamataasat tassaapput nipilersoqatigiit allat aamma piukkunnaateqarluartut, taakkua rockimik  immikkuullarilluinnartumik nipilersortarput. Qaammataasat cd'mik nutaamik saqqummersitseqqammerput. Nipilersoqatigiit tusarnaariarnissaat imminut akilersinnaavoq. Nipilersortartut taakku inuusunnerusunut naleqqupput, inersimasulli 30-t sinnerlugit ukiullit aamma nuannersunik tusagassaqassasut, Atlantic Music isumaqarpoq.  

Mike Thomsen eqqumiitsuliortuuvoq tamatigoortoq aamma nipilersornermut pikkorissuseqarluni. Qatanngunni peqatigalugu festivalimi aliikkusersuissaaq. 

Nipilersoqatigiit nutaat pingasut tamarmik Nuumi Akisuanerit Festivalimi tusarnaariarneqarsinnaapput. 

Hinnarik Nuummi festivalimi nipilersortut nikinnerini oqaluttuussaaq. Sapaammili oktobarip aappaani Katuami Sussat peqatigalugit aliikkusersuissalluni. Tusarnaartitsinissamut tassunga akeqanngitsumik isertoqarsinnaavoq Brugsen Nuuk aamma Grønlandsbanken aningaasaliisuummata.

- Kalaallit Nunaanni nipilersornerup silarsuaani eqqumiitsuliortut piukkunnaateqarluartut amerlanerit nuannaarutissaavoq. Siunissamut neriuuteqarluarnartoq Marianne Elsner isumaqarpoq.

Akisuanerit Festivalimi appisimaartussat ilaat qangali ilisimaneqartuupput.

Mariina ukiualunni tusarsaanngereerluni nipilersoriarnissaminut akuersaarsimavoq, tamannalu amerlasuunit nuannaarutaassaaq. Sussat maaji qaammat 2011 cd'liamik aappaat saqqummersippaat, taannalu tunisaalluarpoq. Nipilersoqatigiit taakku festivalip ingerlanerata nalaani cd'liamik siulliup 5000-nngorlugu tunisaanera kuultinnassutigissavaat.

Nipilersoqatigiit Nanook, ilisariteqqinnissaat pisariaqarpallaanngitsut, cd'liaasa aappaat festivali aallartinngitsiartoq saqqummissaaq. Nanook kuultinnareernikuupput taakkumi cd'liaat 2009-mi kodamit nersornaasissutigaat.

- Inuit Nanook'imik nuannarisallit tusarnaariarunik misigissavaat nipilersoqatigiit piffissap sivikitsup iluani nipilersoqatigiittut ineriartupiloorsimasut, soorluli tassa ukiuni 20-ni nipilersoqatigiissimasut. Tusarnaariassamaartut erinnat nutaat qilanaarisariaqarpaat. AG'ip issatsiannguaq nipilersukkanik nutaanik tusarnaartinneqarnermini nutaalianut ullorissanik tunniunneqarsinnaasunik tallimanit sisamanik ullorialerpai. Marianne Elsnerip tusarnaariassamaartunut takkutijaarnissaq kaammattuutigaa, taamaalillutik Kalaallit Nunaanni nipilersortartut pitsassuit tusarnaarneqarsinnaassammat.

Naggataatigut Atlantic Music'ip aningaasaliisut pingaarnerpaat Air Greenland a/s aamma Tuborg qutsavigai, taakkua tapiinerisigut festivali taama annertutigisoq Kalaallit Nunaanni piviusunngortinneqarsinnaanngormat.

Kiisalu Atlantic Music'ip Grønlandsbanken A/S aamma Brugsen Nuuk immikkut qutsavigiumavai, Hinnarik aamma Sussat sapaammi Katuami meeqqanut tusarnaartitsinissaat aningaasaleeqataaffigimmassuk. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER