IA SF-ilu ullumi suleqatigiinnissamik isumaqatigiissuteqarput

Inuit Ataqatigiit (iA) SF-ilu ullumi suleqatigiinnissamik isumaqatigiissuteqarput

Taamaasilluni SF IA-lu qinigaaffimmi tulliuttumi Folketingimi teknikkikkut qaninnerusumik suleqatigiinnissamik isumaqatigiissuteqarput, partiillu taakkua marluk ukiorpassuarni pitsaasumik suleqatigiissimanerat isumaqatigiissutikkut nanginneqassaaq, Villy Søvndalip, SF, aamma Sara Olsvigip, IA, tusagassiorfinnut nalunaarutaanni allassimavoq. Taamaasilluni politikerit taakkua marluk ritzau-p telegrammia, ullumi siusinnerusukkut nassiunneqartoq quppernermilu matumani ilanngunneqartoq, ilumuunnginnerarpaat.

- Isumaqatigiissut nuannaarutigaara.SF pissusissamisoortumik SF suleqatigisaraa, isumaqatigiissutikkullu partiit taakkua marluk imminnut nukittorsarsinnaapput, tamannalu peqatigalugu Inuit Ataqatigiit uangalu Folketingimi pisariaqartumik politikkikkut namminersussalluta, Sara Olsvig oqarpoq.

Tamatumunnga SF-p siulittaasua Villy Søvndal oqarpoq suleqatigiinneq partiinut marlunnut pissusissamisoortorujussuusoq.

- Nuannaarutigaara isumaqatigiissut inissinneqarmat. Sara Olsvig ataqqisorujussuuvara ulluinnarnilu suleqatigiinnissarput qilanaarisorujussuvara, ukiuni aggersuni partiit peqatigiinnerat nukittorsaqqissinnaaniassagatsigu, Villy Søvndal erseqqissaavoq.

Suleqatigiinnerup ilaatigut kingunerisaanik partiit taakkua folketingimi gruppii inissititernermut atatillugu gruppitut ataaatsitut peqatigiissapput. Tamanna ataatsimiititalianik pilersitsinermut inunnillu toqqaanermut atatillugu pingaaruteqarpoq, kiisalu pisariaqartillugu gruppeqatigiit ataasimiinnerini peqataasarluni.

- Tamatuma saniatigut Inuit Ataqatigiit sinnerlugit folketingimut ilaasortaq Kalaallit Nunannut tunngassuteqartuni Sf-imik suleqateqartarssaaq, tusagassiorfinnut nalunaarummi allassimavoq.

- Inuit Ataqatigiit Folketingimi partiitut namminersortutut inissisimanini attatiinnassavaa partiinut ataasiakkaanut aalajangersakkat malittarisassallu eqqarsaatigalugit, tamatumani ilanngullugit namminermut tapiissutit, tassa tunngaviusumik tapiissutit ilaasortaanermullu tapiissutit, nammineq atorsinnaanerat akisussaaffiginerallu. Tamanna peqatigalugu Inuit Ataqatigiit folketingimi gruppia allattoqarfimmini nammineq atorfinitsitsisinnaanini tassungalu atatillugu ilisarititsisinnaassuseqarnini attatiinnassavai, Sara Olsvig erseqqissaavoq.

Sara Olsvigilli folketingimi partiit allat aamma oqaloqatigisimavai.

- Jyllands-Posten ullumi allammat Enhedslisten-imik suleqateqarnissara tunulliukkiga, ullumi partiimik taassuminnga aamma pitsaasumik ataatsimeeqateqarpunga. Taamaattumik Enhedslistenimik oqaloqateqarnera nangeqqippara, suleqatigiissutigaavullu Issittumut Kalaallit Nunaannullu tunngasut, teknikkikkulli suleqatigiiffiliornata. Tamanna peqatigalugu ataatsimiinnissat taamaattut pillugit Socialdemokratinik Radikale-nillu attaveqarpunga, Sara Olsvig paasissutissiivoq.

Powered by Labrador CMS