Qallunaat inuusuttut imernerujussuat ernumanarpoq

Nunarsuarmi peqqinnissamut suliniaqatigiiffiup WHO-p qallunaajaqqat imigassartornerujussuat ernumassutigaa.

Taamaattumik Danmarkimi naalakkersuisunngortussanut innersuussutigaat imigassamut akitsuutip qaffannissaa, kiisalu imigassamik pisisinnaasut 18-ileereersimasariaqarlutik.

Taama pingasunngornermi allappoq Berlingske.

Taama innersuussineq Europami suliniuteqarnissamut pilersaarutit ilagaat. WHO-mi akuersissutigineqaqqammerpoq Europami imigassamik ajornartorsiuteqarnerujussuaq akiorniarneqassasoq.

Danmarkimilu inuusuttut allaniit immikkooruteqarput. Nunarsuarmi imigassartornerpaatut inissittuartarput. MIsissuinerni kingullerni paasineqarpoq Danmarkimi inuusuttut Europami inuusuttoqatiminnut naleqqiullugit marloriaatingajammik imigassartortartut.

- Akitsuutit qaffanneqartariaqarput, 18-iliisimanissarlu pitsaasuussalluni, Københavnimi WHO-p Europami allaffiani pisortaq Lars Møller oqarpoq.

WHO-p innersuussutai Radikalinit isumaqatigineqarput. Partiimi anguniakkaminni immiaaqqat viinnillu akitsuutaasa marloriaatinngortinneqarnissaat siunnersuutigaat, taamaalilluni immiaaraq nalinginnaasoq 77 ørinik qaffalluni.

- Akitsuusiineq ukioqqortunerunissamillu piumasaqarnerit atorneqarsinnaapput inuusuttut imigassartornikinnerunissaat anguniarlugu, Manu Sareen (R) oqarpoq.

Socialdemokratit aamma SF ilaatigut nioqqutissanik peqqinnanngitsunik akitsuusinerunissartik qineqqusaarutigaat, tamannalu saamerliit naalakkersuisuutitaqarneranni tunngavissat ilagissavaat. Imigassarli allattugaataaniinngilaq, tamannalu WHO-p allanngortikkusuppaa. Socialdemokratilli paasissutissat nutaat nalilersoqqaarusuppaat.

- WHO-p innersuussutai misissorusuppavut, akitsuutillu qaffannissaanut pilersaaruteqanngikkallarpugut, peqqinnissaq pillugu oqaaseqartartoq Sophie Hæstorp Andersen, aviisimu toqarpoq.