Inuussutissarsiornermi periarfissat nalunaarsorneqarput
Uuliamik ujaasinermut atatillugu inuussutissarsiutitigut periarfissat Qaasuitsup Kommuniata kommunini siullersaalluni misissorlugillu nalunaarsorpai
Qaasuitsup Kommuniani borgmesterip Jess Svanep misissuinermit "Offshore onshore"-imit kommunip inassuteqaatai Inuussutissarsiornermut Aatsitassanullu Naalakkersuisumut Ove Karl Berthelsenimut aatsitassanullu pisortamqarfimmi pisortamut Jørn Skov Nielsenimut tunniunniarpai, ataatsimeersuarnermut Joining Forces-imut atatillugu.
Misissuineq maligassiuisutut sulineruvoq. Nunatsinni kommunini siullersaalluni Qaasuitsup Kommuniata avataani uuliasiornermut atatillugu nunami inuussutissarsiornermut periarfissat ataatsimut misissorlugillu nalunaarsorsimavai.
- Misissuineq tamanna ingerlagtsivinnut Avannaani ingerlatsilernissamik soqutiginnittunut, pitsaasumik tunngavissiivoq. Avannaani tunngaviusumik umiarsualiviup inissinnissaanut atatillugu nalunaarusiaq arlalinnik inassuteqaateqarpoq. Aningaasanut ataatsimiititaliap aalajangiineratigut ilaatigut aappaagumiit periarfissaqaleriissaaq inuussutissarsiortunut nunaminernik angisuunik kommunimi atugassaqartitsinissamut, Jess Svane tusagassiorfinnut nalunaarummi allappoq.
Misissuinermit inassuteqaatit tamarmik oktobarip 14-ianni Ilulissani avataani uuliasiornermut ullormut samminniffiusumut atatilugu saqqummiunneqassapput.