Lykketoft siulittaasuunissamut kammartuallaaqaaq

Folketingip nutaamik siulittaasoqalernissaanut Mogens Lykketoft piukkunneqarpoq, talerperliilli Marianne Jelved piukkunneruaat. Lykketoft kammartuallaarnerarpaat

Saamerliuniat talerperliuniallu akornanni ima nuanniilliortoqartigaaq Venstret, Liberal Alliancep aamma Dansk Folkepartip Folketingimi siulittaasumik toqqaanerup isumaqatigiiffiusarnera atorunnaarsillugu.

Taama marlunngornermi ullaakkut allappoq Morgenavisen Jyllands-Posten.

Socialdemokratiniit Mogens Lykketoft (S) piukkunneqartoq talerperliuniat De Radikaleniit Marianne Jelved piukkuppaat.
- Marianne qinikkatut misilittaqarluarpoq qinikkatullu sulinissamik ilisimasaqarluarluni, taamaalilluni immikkuullarissuulluni. Inuttaa aalajaattuuneralu ataqqineqartupilussuuvoq, Venstret gruppeformandia Kristian Jensen oqarpoq.

Folketingetip siulittaasua ilaasortanit tamanit sinniisutut isigineqartarpoq. Taamaattumik siulittaasunngorniunneq ingalassimaarneqartarpoq, naalakkersuisuutitaqartullu piukkussaat illuatungiliuttunit taperserneqartarluni.

Talerperliilli taamaaliorusunngillat.
Folketingimi siulittaasumik toqqaaneq suleqatigiikkusussutsimut misiliutitut takussutissaasarpoq.
Kristian Jensen aamma isumaqarpoq, Mogens Lykketoft kamaqqajaavallaartartoq, qineqqusaarnermilu pisut ilaat eqqaallugu socialdemokraatinut ilaasortap tusagassiortoq appisaluummagu.

Marianne Jelvedip tatigineqarnini takuaa oqarlunili atorfimmut qaffasissumut taamaattumut pilersaaruteqarnani.
- Anguniagarpassuaqarpunga, kisianni taakku suunersut nammineq piginiarpakka, Jyllands-Postenimut oqarpoq.

Folketingetip siulittaasua Folketingimi ataatsimiinnerup avataani allanik suliassarpassuaqarpoq. Siulittaasoq Folketingimi qullersaavoq. Dronningip saniatigut atorfiuvoq akimanerpaatut isigineqartoq.

Powered by Labrador CMS