Meeqqat inuusuttullu atugarissaarnerussapput
Ilaqutariissutsimut, kulturimut, ilageeqarnermut naligiissitaanermullu naalakkersuisoq Mimi Karlsen ikiakkut ataatsimiinnermi meeqqanut inuusuttunullu periusissamik nassuiaateqassaaq
Naalakkersuisut pingaarnerpaatitaaasa ilagaat meerartatta inuusuttortattalu atugarisaasa pitsanngorsarnissaat. Siunertaavoq meeqqat ineriartornissaminnut inersimasutullu pitsaasumik inuuneqalernissaminnut pitsaanerpaanik periarfissinneqarnissaat. Tamatumunnga pisariaqarpoq meeqqanik inuusuttunillu sullissinerni suni tamani ataqatigiissunik, atasinnaasunik siumullu isigisunik suliniuteqarnissaq, Mimi Karlsenip saqqummiussinermut allakkiaani allassimavoq.
Meeqqanut inuusuttunullu periutsip suliniutit pioreersut taarsissanngilai, ukiunili kingullerni meeqqanik inuusuttunillu sullissinermi ineriartornerit pitsaasut amerlasuut aallartinneqarsimasut ingerlateqqinneqassallutik.
Meeqqanut inuusuttunullu periusissami siunertaavoq anguniakkat tamakkua anguniarlugit anguniakkanik piviusunik siunniussinissaq aammalu ingerlatassanik suliniutissanillu pisariaqartunik tikkuussinissaq. Tassa imaappoq, meeqqanut inuusuttunullu periusissaq tulleriiaarinertut atorneqassaaq.
Meeqqanut inuusuttunullu periutsip 2012-imi piviusunngortinnera tamaat 65 mio. kr.-nit missaannik akeqassaaq. 2012-imut aningaasanut inatsisissatut siunnersuummi meeqqanut inuusuttunullu periusissamut 10 mio. kr.-nit immikkoortinneqarsimapput. Tamatuma sanitigut periusissaq suliniutissanut amerlanerusunut atugassinneqassaaq atugassarititanit atorneqanngitsunit 25 mio. kr.-nit, Naalakkersuisut 2009-mi immikkut 2010-mi meeqqanut suliniuteqarnissamut, 2010-mi Toqqissisimasumik Meeraanermut periutsimut, immikkoortissimasaannit.
Naalakkersuisut isumaqarput ilaatigut tusarniaanermi akissutit tunuliaqutaralugit, pingaartumik Kanukokamit kommuninillu kiisalu Akileraartarnermut Atugarissaarnermullu Ataatsimiititaliap inassuteqaatai tunuliaqutaralugit, siusissukkut iliuuseqarnermi tulleriiaarisoqartariaqartoq. Pingaartumik pineqarpoq ukioqqortussutsit malillugit siusissukkut 0-6-inut ukiulinnut ilaqutaannullu iliuuseqarnissaq, naalakkersuisut kissaatigalugu suliniutip nukittorsarnissaa atornerluisunik katsorsaanermut, juumuunut peqqissassunullu aningaasanik amerlanerusunik atugassaqartitsinikkut.
Meeqqanut inuusuttunullu periutsimi suliniutit amerlanerpaat ingerlannissaannut tunngavissaavoq immikkut suliniuteqartoqarnissaa pisariaqartunik sulisoqarnissaq qulakkeerniarllugu, ilinniarsimanngitsut ilinniarsimasullu piginnaanngorsarnerisigut kiisalu iinniagaqartitsinikkut anguniagalimmik iliuuseqartoqarneratigut. Periummi suliniuteqarfissat Ilinniagaqartitsinermut pilersaarummut ilanngunneqarlutillu tulleriiaarneqassapput. Ilanngullugu suliniutit pioreersut atugassarititallu qimerloorneqassapput kiisalu misissorneqassalluni namminersorlutik oqartussani kommuninilu ataqatigiissaarinermut periarfissaq, Mimi Karlsen oqarpoq.
Pilersaarutaavoq meeqqanut inuusuttunullu periusissaq Inatsisartuni oqaluuserineqassasoq oktobarip 4-aanni.