Oqallissaarut: Upperinngilassi

Oqallissaarummi uani Demikraatit Inuusuttaanni siulittaasup, Jacob Larsen-ip Siumut aamma IA eqqoriaanissamut unammillerpai

Demokraatit Inuusuttaasa Siumukkut IA-kkullu qinigaanerup tulliup ingerlanerani namminersorneq pillugu inatsit allanngotinnavianngikkaat eqqoriarlugu qullukkat karsi eqqugassanngorlugu Siumut IA-lu unammillerpai.

IA-p Siumullu qinigassanngortitaasa qinersisartut neriorsorpaat, Namminersorneq pillugu Inatsit allanngortikkumaarlugu, Folketingimut qinigaassagunik. Demokraatit Inuusuttaasa partiit takku marluk unammillerpai qinnuigalugit neriorsuutimik piviusunngortinnissaat uppernarsassagaat.

Demokraatini eqqaasitsissutigissavarput, Namminersorneq pillugu Inatsimmut kalaallit sisamaangaangata pingasut akuersinikuummata. Ukiut pingasut inulaarlugit ingerlareersullu nunatsinni partiit annersaasa isumaqatigiissutertik qimarratiginiarsarilerpaat.

Siumup Nunanut allanut tunngasunut oqartussaaneq tiguniarpaat. Namminersorneq pillugu Inatsit naapertorlugu tamanna pisinnaanngilaq.

Siumup oqartussaaffinnik tigusinigut tamaasa Danmarkimiit aningaasanik pisarusuppoq. Namminersorneq pillugu Inatsit naapertorlugu tamanna pisinnaanngilaq.

IA-p allanngortinniarpaa naalagaaffiup tapiissutaannik naatsorsueriaaseq. Tamanna pissappat Namminersorneq pillugu Inatsit allanngortittariaqarpoq.

IA-p aamma Siumup taamaasillutik qineqqusaarutigaat Namminersorneq pillugu Inatsisip allanngortinneqarnissaa. Demokraatini upperinngilluinnaqqissaarparput, partiit marluk kissaatitik Folketingimi angusinnaassagaat.

Taamaattumik IA Siumullu eqqoriaanissamut unammillerpagut.

Qullukkanik karsimik tunisissaagut, qinigaaffimmi aggersumi Namminersorneq pillugu Inatsit allanngortissinnaassagussiuk kisiannili uuliaatitsinnut oqartussaanerput ataasinnguamilluunniit innarlernagu. Karsi ataaseq unammissutigerusuppisiuk ?

Powered by Labrador CMS