Ironman-imi peqataarusuppoq
Malik Lynge Reiding sapaatiummat Kalundborgimi triathlon sprint-imi ajugaavoq. 2012-imi Hawaii-mi ironman-imi vm-imut anngunnissani siunniuppaa
Malik Lynge Reiding sapaatiummat septembarip 9-ianni Kalundborgimi sprint Triathlon-imi 50-inik peqataaffigineqartumi unammeqataavoq. Unammineq Kalundborg Tri-klub-imit aaqqissuunneqarpoq unammissutaappullu 400 meterimut nalunneq, 18 kilometerimut sikkilerneq 4,2 kilometerimullu arpanneq.
Malik Lynge Reiding ajugaavoq atorsimallugit 54.29 minutsit.
- Kalundborg Triklubip aaqqissuulluagaani ullorissaarsimaqaanga. Naluttarfimmi baneni tamani pingasukkaarluni nalunneq, sikkiliisivinnut korti, sikkilerfimmi maniilakuluttorujussuarmi sikkilerneq sissarlu sinerlugu nunami manissumi seqinnarissumi anorsaartumilu arpanneq, tdaanna quppernermini nittartakkami oqaluttuarpoq.
Tulliullugu siunniuppaa novembarip 27-ianni Mexicomi Ironman Cozumel-imi peqataanissaq, tassanilu anguniarniarpaa VM-imut anngunnissani, taannalu tassaavoq Ironman Hawaii, 2012-imi oktobarimi ingerlanneqartussaq.
- Novembarip qiteqqunnerani Mexicomut aallarnissama tungaanut Danmarkimi sungiusassaanga, Malik Lynge Reiding oqalutuarpoq, taassumalu Samsømi Nordbymi imerniartarfiutini ingerlappaa, Nuummili inunngorlunilu peroriartorsimalluni.