Skip to main content

Oqallisissiaq: IA-p namminersornermut inatsit akuerisartik qimarratigaat

Namminersornermut inatsisip isumaqatigiinniutigeqqinneqarnissaa, Folketingimi amerlanerussuteqartunit isumaqatigineqarnissaa, IA sinnerlugu folketingimut ilaasortamit sulissutigineqarnissaa, Siumup siulittaasuata Aleqa Hammond-ip piviusorsiosorinngilaa. 

 

Nunatta Namminersorneq pillugu inatsit Danmarkimik isumaqatiginninniarnerani nunatsinnit isumaqatiginninniartut ataatsimoorluinnarlutik sinnerluta isumaqatiginninniarput, qulakkeerumallugu kalaallit inuiannut isumaqatigiissut pitsaanerpaajussasoq.

Tupigusuutiginanngitsuunngilaq IA-kkunniit qineqqusaartup Johan Lund Olsenip oqaatigeriasaarmagu Namminersorneq pillugu inatsit naammanginanngitsutut oqaatigalugu nutaamik isumaqatiginninniutaasariaqarneranik oqalulermat. Suli tupigusunnera annertuseriaannarpoq ippassaq Kuupik Kleistip tamanna aamma isumagalugu uppernarsarmagu.

Kuupik Kleist  Namminersornerup inatsisissaata suliarinerani aningaasaqarnermut tunngasut akisussaaffigalugit issiasuutitaavoq nunarput sinnerlugu. Toqqaannaartumik sunniuteqarfigisinnaasimavai  isumaqatigiissutissat. Suliaq tamannarpiaq maanna IA-kkut ajoraat isumaqatiginninniaqqittoqartariaqarneranillu suliniarlutik oqalupput.

Ilumut oqariartornerit taamatut ittut ernumartuupput nunattalu isigineqarneranut tutsuinginartutullu sulinersutut apeqquserneqaatigissangatsigu. Isumaqarpunga IA-kkormiut folketingimut isernermikkut suliassatut pingaarnertut suliariniarlugu oqalunnerat uppernassuseqanngitsoq.  Isumaqarlungali taamatut oqarsimaneq paatsoornermik aallaaveqarsimassasoq Kuupiullu sassartitaminut illersuipallanniarnermini uppernarsartariaqarsimagaa. Kialluunniit partiimi siulittaasuusup erseqqissaassummik inaaliinermillu siunnerfeqartumik paatsoornerit aaqqissimasinnaavai imaluunniit qineqqusaartumut erseqqissaaqqusisoqarsimasinnaalluni.

Namminersornermut inatsit isumaqatiginninniarsimasunit partiinillu tamanit isumaqatigiissutaalluni atsiorneqarnikuuvoq, allannguutitaqassappallu aallatulluunniit isumaqatiginninniutigineqassappat, inatsisartunik tunuliaquteqartoqartussaavoq Naalakkersuisullu peqquneqassapput inatsisartut sinnerlugit isumaqatiginninniartoqarnissaannik oqariartortoqassallunilu nunarput kukkusumik isumaqatigiissuteqarsimammat nassuerutiginnilluni isumaqatiginninniaqqikkumasoq.

Piviusorsiortuunngilaq IA-kkormiut folketingimut qinigassanngortitaannit isuma iluarineqarmat isumaqassalluni Danmarkimi naalakkersuisuusut isumaqatigissagaat. Naalakkersuisuisami isumaqataatitsiniarneq sulissutigilissappassut folketingimi amerlanerussuteqarfigisariaqarpaat isumaqatiginninniarnissaq aallarteqqissappat. Isumaqanngilluinnarpunga Danmarkip naalakkersuisunit maanna isumaqatigineqassasoq IA-kkut kissaatigimmassuk suliaq aallartissagaat. Danmarkimut aningaasatigut annertunerusumik kingunilimmik nutaamik isumaqatiginninniarnissamut imaaliallaannaq nassueruteqarnissaat ilimananngeqaaq.

Taavami ukiut ilaanni nunatsinni aningaasat nalingata appariartornera Danmarkimi appasinnerulersimassappat, taava IA-kkormiut aammaarlutik piumasariniarpaat Namminersornermut Inatsit isumaqatiginninniutigineqaqqissasoq? Politikkimi oqallinnermi qineqqusaarnermilu qaa ataqqinartumik sulisoqarli – qinersisartut ataqqinartumik  qineqqusaarfigineqarnissaat pili!

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER