Skip to main content

Oqallisissiaq: Suliniutinut aningaasat immikkoortitat atornerlunneqartariaqanngillat pingaarpallaaqigamik

Sofia Rossen-ip, IA-meersup Juliane Henningsen peqatigalugu, suliniutinut aningaasat immikkoortitat, kalaallit Danmarkimi najugallit atugarliortut sulissunnissaannut atugassat qulakkeernissaat, Den Nordatlantiske Gruppe-mi sulissutigisimagitsik oqaatigaa

 

Neriuppunga Siumup immikkut aningaasat immikkoortitakkat (satspuljemidlerni) atornerlunneqartariaqanngimmata isumaqatigissagaanga.  Qineqqusaarnerulluunniit naligigaluarpagu. Inuiaqatigiinnimi sanngiinnerpaanut tamanna iluaqutaanavianngilaq aningaasammi taakkua pisariaqartitsilluinnartunut ikiuutissaammata.

Siumup 5. septemberimi tusagassiuutinut nalunaarutaa immikkut aningaasat immikkoortitakkat Siumut iluatsinnikuuaat (”satspuljemidlerne er Siumuts fortjeneste”) oqaaseqarfiginiarakkut siunertarinngilara suliamut tassunga pingaartumut ataqqinaat tiguniarsarigiga.  Taamaaliorpunga Atlantikup Avannaani Suleqatigiit politikerit kalaallit Danmarkimi inuuniarnikkut atugarliortut akornanniittut atugaannik pitsanngorsaaniarlutik qanoq pimoorullugu sulinerat eqqortumik assersuusiorusukkakku.  Tamatuma iluaqutaaneranut erseqqissunik takussutissaqarpugut.

 Tassunga atatillugu Siumup tusagassiuutinut nalunaarummi tassani Nuummi Ilulissanilu Qaqiffik pillugu oqaaseqaataa soorunami tassunga tunnganngilluinnarpoq, taamaattumillu taannartaa – ilomoorsimappat ilumuunngikkaluarpalluunniit,  uanga oqaaseqarfiginianngilara.   

Assersuutit eqqortut

Juliane Henningsenimut sinniisutut Grønlandsudvalget sinnerlugu siorna junimi Socialministeri isumasioqatigiumallugu aggersarpara tassanilu atugarliortunut isersimaartarfinnut kalaallinullu atugarliortunut pilersaarutinut sipaarniuteqarnera erseqqissaavigalugu. Taamanikkut ministerip iliuutsinut tapiissuteqaannassanersoq neriorsuutigisinnaasimanngilaa.  

Juliane Henningsen folketingimut upertoq 2010-mi oktoberimi. Iliuuseq aallartissimasara ingerlateqqippaa Grønlandsudvalgi 26. oktober 2010 kalaallit Danmarkimi atugarliuortut pillugit temamødeqartitsimmat. Immikkut aningaasat immikkoortitakkap aningaasartaanik finanslovimi ilanngaanissamik pilersaarutaasoq kalaallinut atugarliortunut annertoorujussuarmik sunniuteqartussaapput. Temamødemi salliutillugu sammineqarpoq pissutsit aammalu kalaallinut atugarliortunut neqeroorutit, taakkununnga ilaalluni massakkut neqeroorutaasut siunissami qanoq aningaasalersorneqarnissaat. Ataatsimiinnissamut pilersaarusiorneq Atlantikup Avannaani Suleqatigiit ilaatigut atortussanik tunuliaqutaasussanik aallarniisussatullu piukkunnartunik siunnersuut il.il., tunniussisoq qanimut suleqatigalugu ingerlanneqarpoq.  Gruppissaaq ataatsimiinnissaq sioqqullugu qanimimut oqaloqataavoq – kajumissaarutigalugulu immikkut aningaasat immikkoortitakkamut oqaaseqartartut oqaaseqartartullu attuumassuteqartut allat – folketingimi partimut sumut ilaaneq uniffiginagu suleqatigiinnissaat .

Grønlandskudvalgemut ilaasortat soccialudvalgillu ilaasortaasa saniatigut paasisimasallit arlallit aggersarneqarput. Tamakkua tamarmik arlaannut tunngatillugu immikkut paasisimasaliupput Danmarkimilu kalaallinut atugarliortunut ilisimasaqartuullutik.  Aggersarneqartut ilaatigut tassaapput SUS-netværkimeersut, Kofoeds Skolemeersut, kalaallit illuineersut Socialministeriameersullu.

Iluaqutaavorlumi

AG ilaatigut 2010-mi oktoberimi allappoq ”isersimaartarfiit annapput – Folketingimi isummamik allanngortitsineq kalaallit illuini nuannaaruatigineqarpoq” aamma ”IA-p Folketingimi ilaasortaatitaa (Juliane Henningsen) suleqatini peqatigalugit qallunaat politikeri immikkut aningaasat immikkoortitakkat tunuanniittut allamik isummertippai”.

Taamaattumik isertorsinnaanngilara Juliane Henningsen uangalu misigisaq taanna nuannaarutigeqalugulu tulluusimaartorutigeqigatsigu, siorna ukiakkut qujaniuterpassuarnik nassissorneqaratta ilaatigut inuiaqatigiinni sanngiinnerpaat pitsaanerpaamik atugaqarnissaannik qularnaariniarluta suliaq pillugu. Tamannami iluaqutaallunilu nuannerpoq.

Sofia Rossen, Folketingimut IA sinnerlugu qinigassanngortitaq

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER