Kalaallit Nunaanni sukkortut isumagineqarnerat pitsanngorpoq
ph.d.-nngorniutigalugu Aarhus-imi Det Sundhedsvidenskabelige Fakultet-imi suliaq, Kalaallit Nunaanni sukkortunut pingaaruteqarlualersinaavoq
Kalaallit Nunaanni inoriaatsimik aallaavilmmik type 2 diabetes-imik sukkornermik nappaateqarlertartut amerligaluartut, siorna Nunatsinni peqqinnissaqarfimmi sukkortut isumagineqarnerat 2008-mut sanilliullugu malunnartumik pitsanngorsimasoq, misissuinerit naammassineqaqqammersut takutippaat.
Misissuinermut akisussaasuusup nakorsap Michael Lynge Pedersen-ip paasisani, septembarip 7-anni Nuummi saqqummiullugit illersussavai.
Pitsannguut peqqinnissaqarfimmi suliassat sukkortunut attuumassutillit aaqqissuulluarlugit malittarineqarsimanerannik pissuteqarsorineqarpoq.
Sukkornermik nappaatillit pitsaanerusumik isumagineqarnerisigut nappaateqarnaveersaarneq saniatigullu nappaatigineqalertartut, soorlu uummatikkut qaratsakkullu aanaartoornerit, tartulunnerit kiisalu tappingernerit takkunissaat, kinguartinneqartarpoq.
- Misissuinerup nalaani Kalaallit Nunaanni sukkornermik nappaateqalertartut amerlisimapput, tamatumalu takutiinnarpaa, sukkortunik isumaginnilluarneq aaqqissuullugu piareersariigaq qanoq pingaaruteqartigisoq. Suliarisap ingalannerani aamma paasineqarpoq, nappaatit katsorsarneqarsinnaanngitsut aaqqissuulluakamik isumagisinnaanerisigut pitsaanerusumik ikiorserneqarsinnaasartut, Michael Lynge Pedersen oqarpoq.
Ph.d.-nngorniutigalugu suliaq, taaguuteqartoq "Diabetes mellitus in Greenland. Prevalence, organisation and quality in the management of type 2 diabetes mellitus. Effects of a Diabetes Health Care Project" Nuummi Peqqissaanermik Ilinniarfimmi septembarip 7-anni nal. 15.00 illersorlugu saqqummiunneqassaaq.