Siumut: DNAG qanganngoreerpoq
- Siumup socialdemokratinik suleqateqarnermigut Folketingimi sunniuteqarsinnaaneq qulakkiissavaa, Siumup siulittaasua Aleqa Hammond tusagassiuutitigut nalunaarummi taamatut allappoq
- Nikoline Ziemer, ungasinngitsukkut IA-mut ilaasortanngortoq folketingimullu qinigassanngortittoq, qanoq pisoqarneranik paasisaqarsimanngiinnarani, aamma qinigassanngorttittu allat atlantikup avannaaneersut Den Nordatlantiske Gruppe-mut Kalaallit Nunaata oqaluttuarisassartaanit qaangiutereersumit ilaasortaarusunngitsut isornartorsiorpai, Siumup siulittaasua Aleqa Hammond, tusagassiuutitigut nalunaarummi taamatut allappoq, Nikoline Ziemer-ip qinigassanngortittut tamaasa qinigaangaluarunik DNAG-mi suleqataarusunnerlutik oqartarnissaannik piumaffigimmagit akissuteqaateqarfigalugu.
- Folketingimi Den Nordatlantiske Gruppe Siumup sulissuteqarneratigut pilersinneqarpoq. Kalaallit Nunaata (Savalimmiullu) namminersulernissaannut suleqatigiiffittut. Taamani Kalaallit Nunaata namminersulivinnissaanut oqartussaaneq Folketingimiimmat.
- Pissutsit taamaakkunnaareerput, Aleqa Hammond oqarpoq.
- Namminersorlutik Oqartussat pillugit inatsimmi oqartussaaneq tamanna kalaallit namminneq tigunikuuaat. Taamaammat Folketingimi Den Nordatlantiske Gruppe atorfissaaruppoq, EF-imiit aninitsigut soorlu ANISA atorfissaaruttoq.
- Taamaammat Folketingimi Siumut qangalili Socialdemokratinik suleqateqalernikuuvoq. Siunissaq eqqarsaatigalugu Kalaallit Nunaata soqutigisaasa, aamma aningaasatigut immitsinnut ingerlassinnaanngorluta namminersulivinnissarput qinissanerlutigu nammineq aalajangersinnaaleraluarutsiguluunniit, Danmarki suleqatigalugu alloriaqqinnissaq aqqutissiuusseqataaffigisinnaanngorlugu, Aleqa Hammond naqissusiivoq.
- Tamassuma saniatigut - minnerunngitsumik kalaallit Danmarkimi najugaqalersimasut soqutigisaat pillugit - Folketingimi partiit allat suleqatigilluarlutigit.
- Foketingimi Siumup Kalaallit Nunaata soqutigisaannik isumaginniniarnera, Folketingimi kialluuniit qularutiginngilaa.
- Folketingimi pissusiviusut ilisimasaqarfiginerat aallaavigalugu maani oqallittoqartuuppat qujanassangaluarpoq, taamaanngippat Kalaallit Nunaannik isumannaatsiumik sullissinertut taaneqarsinnaassanngimmat.
- Nikoline Ziemer-ip allaat oqaatigaa, Den Nordatlantiske Gruppe assigiinngitsorpassuartigut soqutigisaqaqatigiiffittut Danmarkimi politikkikkut suleqatigiiffiusosq.
- Siumup socialdemokratinik suleqateqarnermigut Folketingimi ersarissumik nipeqarpoq, Danmarkimi ministeriuninngortussaq toqqaannartumik suleqatigalugu. Sunniuteqarniaraanni pitsaanerusumik inissiffissaqanngilaq, Aleqa Hammond naqissusiivoq.