Skip to main content

Isukasia pillugu innuttaasunik ataatsimiisitsineq illuinnaasiortoq

- Sooruna uliuni kingullerni tallimani arfinilinni Isukasiani misissuineq pillugu London Mining Greenland A/S taama nipaarsaartigisoq? Isukasiani saviminermik piiaavissaq pillugu septembarip aallaqaataani London Miningip innuttaasunik ataatsimiisitsinissaa sioqqullugu Avatami siulittaasup tullia Pitannguaq Titussen tusagassiuutitigut nalunaarummi aperaaq

London Mining Greenland A-S illuinnaasiortumik paasisitsiniaaqqilerpoq Isukasiani saviminissarsiorniarneq pillugu, avatangiisinut suliniaqatigiiffimmi siulittaasup tullia Pitannguaq Tittussen tusagassiuutitigut nalunaarummi allappoq.

Nunatsinni – Nunarput pillugu! London Mining A/S-ip oqaasinnaarivaa.

- Siullermik innuttaasut  Katuami ataatsimiisinneqalermata 2010-mi novemberimi “puigorneqarsimavoq” innuttaasut ilisimatissallugit. Ataasimiisitsineq taanna tuluttuinnaq naqitanik paasissutissartalik inunnit ikittuinnarnit peqaaffigineqarluni ingerlanneqarpoq. Tupinnanngitsumik  innuttaasunit amerlasuunit tupaallaatigineqaqaaq pilersaarutip qanoq annertussusia paasineqalermat innuttaasunillu toqqissisimannginnermik pilersitsilluni. Tamanna KNR radiokkut oqallittarnerni arlalitsigut erserpoq.  Aappassaanik paasisitsiniaasoqarmat aammaarlugu ukioq manna paasissutissat tuluttuinnaq naqitat  pigineqarput, kalaallisut qallunaatullu paasissutissanik pingaarutilinnik saqqummiussuisoqarani, Pitannguaq Tittussen allappoq.

- A/G-imi aggustip 24-iani saqqummersumi atuarneqarsinnaavoq London Mining Greenland A/S innuttaasunik ataatsimiisitsiniartoq Nuummi katersortarfimmi septembarip 1-ani 2011 nal. 19.00-22.00 tungaanut.  Avatamiit nunatsinni London Mining Greenland A/S-ip paasissutissiisartua  Kaj Kleist toqqarlugu oqaloqatigisimavarput  aperalugu saqqummiunniarneqartut kalaallisut qallunaatullu naqitanik takussutissartaqarnersut.

- Oqarfigineqarpugullu tuluttuinnaq saqqummiunneqassasut seqersittakkatigut, saqqummiussisussanngooq tuluttuinnaq oqalummata,  kisiannili kalaallisut nutserisoqarumaartorooq – naak oqarluartaarutip Nunatsinni Nunarput pillugu isumaa? Pitannguaq Tittussen aperaaq.

-

London Mining Greenlandip qarasaasiakkut nittartaaga misissoraanni paasissutissat qarsupittut kalaallisut taamaallaat takuneqarsinnaasut ikittuinnaapput. Pingaarutillit tuluttuinnaq allassimapput. Aamma taamaappoq aatsitassaqarnermut pisortaqarfiup nittaartaagini paasissutissamernit  qarsupittut annikitsuinaat kalaallisut pigineqartut.

- Aperisariaqarpugut London Mining Greenland A/S sooq taama nipaarsarussisutut pissusilersorlunilu- ukiuni misissuiffiusuni arfinilinni ingerlatsinersoq? Nuup Kangerlua – Qussuk, Qussuup Narsarsua, Ilulialik, Aningannaaq, Ujarassuit, Majuala annertoorujussuarmik nunatarsua  ajortumik sunnerneqartussaapput  soorunalumi aamma kangerluup imartaa. Tamaakkaluartoq pilersaarut naammassiartuaarneqarpoq Nuummiunit annertunerusumik ilisimaneqanngilluinnarluni.

-Avatangiisinut pinngortitamullu isummersuutit Isukasiani pilersaarutit pillugit Sermersuup kommuniani kommunal politikkeriniit annerusumik tusarsaasoqanngilaq .

Paasissutissiineq illuinnaasiortoq

- Avatami pilersaarutip annertuup ingerlanniarneqarnera annertuumik tusagassiutitigut assigiinngitsuni uparuartortarsimavarput. Ilaatigut aatsitassanut naalakkersuisumit akineqartarpugut suliaq ajunngitsumik ingerlanneqartoq – tamaattoqanngilluinnarporli – suut tamaasa akimorlugit suliaq ingerlanneqarpoq, ajorluinnartumik innuttaasunut ataatsimiisitsinerit ingerlanneqartarput, kalaallisut qallunaatullu paasissutissanik pingaarutilinnik peqartoqanngilaq, saqqummiuneqarnerluunniit ajorlutik.

- Naalakkersuisut  namminneq VVM-imimut (avatangiisinut sunniutissat nalilersornerat) ilitsersuutertik taamaasillugu unioqqutillugu ingerlappaat.

VVm pillugu ilitsersuutit aatsitassanut pisortaqarfiup nittartagaani makku atuarneqarsinnaapput tulluinnarlu allassimallutik:

VVM-it suliarineqarnerini Aatsitassanut pisortaqarfiup innuttaasut peqataatinneqarnissaannut ilitsersuut http://www.bmp.gl/images/stories/minerals/EIA_guidelines_mining.pdf aaneqartoq 26/8-11.

Pisortatigoortumik tusarniaaneq (qupp. 8):

VVM-ip ingerlanneqarnerani innuttaasut peqataatinneqartariaqarput aammattaaq aatsitassarsiorneq aallartippat ingerlatanut pisunut paasitinneqartassapput.  Suliap ingerlanneqarnerani siusinaartumik pisortatigoortumik ataatsimiisitsisoqarnissaa inassutigineqarpoq,  VVM-imut nalunaarusiornissamut immersueqataanissamut atatillugu. Nalunaarusiap pisortanut  oqartussanut tunniunneqartinnagu minnerpaamik pisortatigoortumik ataatsimiisitsisoqarsimanissaa paasissutissanik pisariaqartunik imalimmik pisimanissaa inassutigineqarportaaq”.

Hvidbog - Arlaannaanulluunniit attuumassuteqanngitsumik naqitamik paasissutissaq

Malittarissasat ersarissut aammalu innuttaasut peqataatinneqarneranni ingerlatsinissaq hvidbogimi allaaserineqarsimassapput pilersaarutaasunut illuatungiliilluni oqaaseqaateqarnermi. Hvidbogi innuttaasut oqaaseqaataanut tassaavoq takussutissaq imalt. taakkua inerniliinertaat. Aammattaaq selskabip oqaaseqaatai apeqqutaalu ilaatinneqassapput taakkua isumannaarneqarnissaanut siunnersuutitaqassallutik VVM-ip ingerlanneqarneranut atatillugu, imalt. taamaattoqanngippat ersarissumik  tunngavilersukkamik allanneqassaaq,  sooq pineqartut nalunaarummi ilanngunneqarusunnginnersut.  Hvidbogi oqaaseqaatinik apeqqutinillu imalik aammalu selskabit akissutaanik imaqartoq immikkut ittumik nalunaarusiorneqassaaq. Innuttaasut peqataatinneqareerpata VVM-i misissoqqissaarneqassaaq kingornalu oqaaseqaatit/apeqqutillu aammalu selskabip akissutai pisortanut  naqitap suliarineqarnissaanut ilanngunneqarsimassapput.   Illuatungiliinerit, oqaaseqatit il.il. innuttaasunut saqqummiunneqarsinnaapput. Taamatut saqqummiineq sivikinnerpaamik sap.ak. arfinilinni pissaaq".

VVM-imimik nalunaarusiap piffissalersorneqarnera

1. Pisortatigoortumik VVM pillugu nalunaarusiassamut tunngatillugu innuttaasunik  ataatsimiisitsi-neq.

2. VVM-imik nalunaarusiornissamut atugassanik siunnersuutit aatsitassanut pisortaqarfimmut nassiunneqassapput.

3. Aatsitassanut pisortaqarfiup siunnersuutit nalilersussavai.

4. VVM-imut missingersuusiaq aatsitassanut pisortaqarfimmut nassiunneqassaaq.

5. Aatsitassanut pisortaqarfiup nalunarusiassamut missingersuut nalilersussavaa.

6. VVM-imut nalunaarusiaq aatsitassanut pisortaqarfimmut nassiuneqassaaq.

7. Pisortatigoortumik tusarniaaneq/innuttasut ataatsimiisinneqarnerat VVM-imut nalunaarusiaq pillugu.

8. VVM-imut nalunaarusiaq innuttaasunut saqqummiunneqassaaq pisortatigoortumik tusarniaanermi.

9.Pisortatigoortumik tusarniaasimaneq misissorneqassaaq nalilersorneqarlunilu aammalu VVM-imut nalunaarusiaq misissoqqissaarneqassalluni.

10. VVM-imut nalunaarusiaq aatsitassanut pisortaqarfimmut  aatsitassarsiorsinnaanerup aallartinneqarsinnaanerata akuerineqarnissaata qinnutigineqarnissaa siunertaralugu nassiunneqassaaq.”

 Naaminersornerusut VVM-imut  tunngatillugu nammineq ilitsersuutertik (guidelinesertik) taamaasillugu malinnagulu unioqqutippaat London Mining Greenland A/S-imut tunngatillugu. Avatami isumaqarpugut tamanna demokratiimik ingerlatsinermi eqqortuliornerunngitsoq annertooq – pingaartumik suliariniarneqartumik taama annertutigisumut tunngatillugu – piumasarineqartariaqarporlu innuttaasut Nuup kangerluanut tunngatillugu annertunerujussuarmik pisortagoortumik paasitinneqarlutillu peqataatinneqarnissaat – illuinnaasiortumik London Mining Greenland A/S paasissutissiinermik ingerlatsinera naammaginnanngilluinnartumik ingerlanneqarmat.

Nassuiaatit:

VVM - Vurdering af virkninger på miljøet – Avatangiisit sunniutaasinnaasunut nalilersuivigineqarnerat.

Guidesline – ilitsersuut. (http://www.bmp.gl/images/stories/minerals/EIA guidelines mining.pdf)

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER