Pilatsittut timaasa piffissaq unittutut misigisarpaat

Napparsimmavimmi pilatsinneq piffissap qanoq ilineranik misigisaqarnermik allanngotitsisarpoq. Pilatsittuut tamanna ilaanni ima puullaaqissutigilertartigaat allaat toqqutigisinnaanera ulorianarsinnaalluni

Pilatsittut piffissap ingerlanera malugisinnaajunnaartarpaat. Ass.: Polfoto

Sivisuumik timmisartorneq kisimi nalunaaquttap qassinngorneranik timitta paatsiveerussutigisanngilaa. Napparsimmavimmi pilatsittut tamanna aamma misigisarpaat, pilatsinnerlu sivisunerujartortillugu pilatsittup tamanna ajornnerujartuinnartumik misigisarpaa, Videnskab.dk-mi allaaserineqaartoq naapertorlugu Herlev-ip napparsimmaviani paasisassarsiornerit tamanna takutippaat.

Ismail Gögenur, Herlev-imi Napparsimmavimmi immikkoortortami Kirurgisk Gastroenterologisk-imi atorfilik, paasisassassarsiorneq pillugu ilisimatuussutsikkut nalunaarusiorsimavoq.
- Pilatsittut timaasa piffissamik misiginninnerat unilluni ullup ingerlaneranik misiginnissinnaajunnaartitsisartoq, ilisimatuussutsikkut paasisassarsiornitsinni paasivarput. Taassuma sunniutaa, akunnerni sisamani tallimaniluunniit kangimut timmisartornertut pilatsittup timaata malugisarpaa, taanna Videnskab.dk-mut oqarpoq.

Inuit peqqissut timaasa piffissamik paatsiveerussisarneq pinartumik ajorqutigisanngilaat. Nalinginnaasumik taakkua piffissami sivikitsumi qasullutik misiginermik timmillutillu malugisarpaat. Inuilli napparsimareersut pilatseqqammersullu sakkortunerusumik tamanna kinguneqartittarpaat, ilaannilu taamatut timaannik innarliineq ulorianarsinnaavoq.

København-ip Universitetiani professori Jacob Rosenberg aamma Herlev-ip napparsimmaviani nakorsaaneq Institut for Kirurgi og Intern Medicin-imi atorfilik taamatut oqarput. Taanna aamma immikkut paasisassarsiornermut peqataasimavoq.

- Piffissamik timip paatsiveerussisarnera napparsimasup puullaaqissutiginerulertarpaa. Inuk taqqaminik milittoorsimasup timaa imak innarlerneqareersimasarpoq allaat saniatigut aamma timaata piffissamik paatsiveerussineq artorsaataasinnaasarluni, taanna oqarpoq nangillunilu:
- Tamanna uummammik kassuttoornermik taqqanillu milittooqqinnernik kinguneqarsinnaavoq taamaammallu napparsimasup inuuneranik ulorianartorsiortitsisinnaalluni.
Piffissamik paatsiveerussineq napparsimasunut ulorianarsinnaavoq, ilisimatuulli aaqqiissutaasinnaasumik nassaarsimasoripput. Sivisuumik timmisartorsimasut assigalugit pilatserlaat melatonin-imik iisitillugit katsorsarneqarsinnaasut misissuinerit takutippaat.

Melatonin-ip katsorsaataasinnaanera suli uppernarsarneqanngilaq, Ismail Gögenur-illi oqaasii naapertorlugit misissuinernit paasisat neriulluarnarput.

Powered by Labrador CMS