Skip to main content

Ukiaanerani Inatsisartut katersuunnerat

Ullut 23-t ingerlaneranni oqaluuserisassat 137-it

Inatsisartunut ilaasortat 31-t septembarip 16-ianni katersuukkunik ulapputeqqilissapput. Taakkua sanilatigut naalakkersuisunut ilaasortat arfineq marluk, inatsisartuniit sulinngiffeqartut ataaserlu qinigaanikuunngitsoq peqataassapput. Taakkua aamma septembarip 16-ianniit novembarip 15-ianni naammassinissamik tungaanut ulapputeqataassapput.  

Ulluni 23 ataatsimiinnissaq pilersaarutigineqarpoq. Inatsisartut siulittaasuat Josef Motzfeldt taamatut nalunaarpoq.

Marlunngornikkut, pingasunngornikkut, sisamanngornikkullu nalinginnaasumik ataatsimiittoqartassaaq. Ullulli ataasiakkaat allannguuteqartinneqarput, soorlu ulloq siulleq pisarnertut naalagaiaqatigiiffiusussaq. Taassuma saniatigut aamma ataasinngorneq novembarip 14-iat ataatsimiiffiussaaq. Sisamanngorneq novembarip qulingat ataatsimiiffiussanngilaq. Kiisalu apaatip akunnera 44, ataasinngorneq oktobarip 31-anniit tallimanngorneq novembarip sisamaanni Nunat Avannarliit Siunnersuisoqatigiit ataatsimiinnerat pissutigalugu ataatsimiittoqassanngilaq, ataatsimiititalialli sulinerat sapaatip akunnerani tassani ingerlaannassaaq, taamatut Josef Motzfeldt.

Oqaluuserisassatut naalakkersuisut siunnersuutaat 24-it nalunaarutigineqarput. Taakkua saniatigut suli inatsisissatut siunnersuutit tallimat, nalunaarusiat sisamat aalajangiiffigisassarlu ataaseq inatsisartut suli utaqqivaat.  

- Taakkua siunnersuutissat qulit oqaluuserisassanut ilanngunneqarnissaat nalunaarutigineqareeraluarpoq, sulili Inatsisartut Allattoqarfiannut apuutingillat, piffissalli ingerlanerani tunniunneqartassallutik. Taamaakkaluartoq oqaluserisassat 24-t tamarmik oqaluuserisassanut ilanngunneqareerput, naalakkersuisut nalunaaritaattut naapertorlugu taakkua Inatsisartut Allaffeqarfiannut tunniunneqarnissaannut killigititat aalajangerneqareerput, Josef Motzfeldt nalunaarpoq. 

Oqaluuserisassat 17-it oqaluuserineqarnissaat kinguartinneqanngikkunik siusinnerusukkut siullermik oqaluuserineqarerlutik 2011-mi ukiaanerani oqaluuserisassanngortinneqarnikuupput. 

Inatsisartut siulittaasoqarfianiit innersuussutigineqarpoq, siunnersuutit taakkua toqqaannartumik taasissutigineqarnissaat, 2011-mi upernaakkut ataatsimiinnermi oqallinnerit nanginneqarnissaannut immikkut pissutissaqqanngippat. Naalakkersuisut aamma/imaluunniit Inatsisartunut ilaasortat qinnuigineqarput, oqaluuserisassat arlaat oqaluusereqqillugu isumaqatigiinniutigineqaqqugunikku, oqaluuserineqartinnagu tamanna siulittaasoqarfimmut nalunaarutigeqqullugu.  

Inatsisartunut ilaasortaniit oqaluuserisassatut siunnersuutigineqartut nutaat 69-it oqaluuserisassanut ilanngunneqarnikuupput. 

Inatsisartut siulittaasuata tassunga atatillugu nalunaarutigaa, sapaatip akunnerata ingerlanerani aalajangersimasumik apeqquteqarniartut periarfissinneqartassasut, taamaammat pingasunngornerit tamaasa nal. 11.00-imiit 12.00-ip tungaanut apeqquteqartoqarsinnaasassaaq, tamatumalu kingorna nal. 13.00-ip tungaanut ataatsimiinerit unitsinneqarallartassallutik.  

Siulittaasoq aamma nalunaarpoq, ataatsimiinnermi oqaluuserisat ulluliunneqartumi naammassineqanngitsut ullup ataatsimiiffissap tulliani nanginneqartassasut.  

Josef Motzfeldt-ip aamma erseqqissarpaa, Inatsisartunut ilaasortat imaluunniit partiit oqaluuserisassat pillugit oqaasissaqarunik kissaateqarunilluunniit tamanna kingusinnerpaamik Inatsisartut kateriinnerat sapaatip akunneranik ataatsimik sioqqullugu tamanna nalunaarutigisaqqullugu qinnuigalugit. 

Oqaluuserisassatut siunnersuutit maannakkut ataatsimiinnissami aappassaanneerlugit imaluunniit pingajussaanneerlugit oqaluuserineqassanersut imaluunniit 2012-imi upernaakkut ataatsimiinnissami nangeqqinneqassanersut, Inatsisartut ukiaanerani ataatsimiinnerminni aalajangiiffigisassagaat.  

Siulittaasup aamma malugeqquaa, Inatsisartunut ilaasortat siunnersuutimik kalaallisut qallunaatullu eqqortumik allassimanissaat, namminneq akisussaaffigissagaat.  

- Paatsuunganartoqassangaluarpat, kalaallisuua atortussaatinneqassaaq. Oqaatsitigut erseqqissaateqarniartut tamatuma 2011-mi ataatsimiinnermi oqaluuserisassap tullinnguutinnginnerani Allattoqarfimmut nassiutereerneqarsimanissaat kissaatigineqarpoq,  Josef Motzfeldt allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER