Qallunaat tarnimikkut nappaatillit amerlanerusut imminortarput

Qallunaat tarnimikkut nappaatillit svenskinit taamaaqatiminnit amerlanerujussuit imminortarput, tamanna misissuinerup, immikkut ilisimasalinnik tupatsitsisup, takutippaa

Qallunaat kisitsisaataat svenskit kisitsisaataannut sanilliullugit takuneqarsinnaavoq tarnimikkut nappaatillit imminortartut amerlassusaat nikingasorujussuusut. Ass.: Leiff Josefsen

Danmarkimi tarnimikkut nappaatillit, katsorsaasartut attaveqarfigereerlugit imminortartut Sverigemit 18-eriaammik amerlanerupput.

Tamanna takuneqarsinnaavoq nunani avannarlerni tarnimikkut nappaatilinnik sanilliussassatut misissuinermi, Nordisk Ministerrådip suliaritissimasaani, taamatut allappoq Information.

Nalunaarusiami naatsorsorneqarpoq tarnimikkut nappaatilinnit 100.000-init 18-it sinnerlugit ukiulinnit 2009-mi qassit imminorsimanersut. Sverigemi kisitsit 0,31-iusoq Danmarkimi 5,6-iuvoq - tassa 18-eriaammik amerlanerullutik.

Kisitsisit taamaattut nunanut avannarlernut allanut pissarsiarineqarsinnaanngillat - Mads Koch Hansenili, Lægeforningip siulittaasua, oqarpoq assigiinngissut "tupassutigalugu":
- Nakorsatut akueriuminaappoq nunani imminnut assingusorujussuarni Danmarkimisut Sverigemisullu ittuni tarnimikkut nappaatillit imminortartut amerlassusaat taama assigiinngissuteqartigimmata, Mads Koch Hansen Informationimut oqarpoq.

Ilaqutaasut peqatigiiffianni Bedre Psykiatri-mi generalsekretær Thorstein Theilgaardip assigiinngissut tamanna taavaa "aarlerinartutut alianartutullu".
- Imminortartut amerlassusaat takussutissaavoq nunami pineqartumi inuit tarnimikkut nappaatillit qanoq pitsaatigisumik ingerlalluartigisumillu katsorsarneqartarnersut - katsorsarneqartannginnersulluunniit. Tamanna pakatsinaqaaq.

Nappaatinik allanik, soorlu kræftimik katsorsaanerit pitsanngoriartuinnarsimasut, tarnip pissusianik nappaatinik katsorsaaneq ukiuni kingullerni qulini kataanneqariartorsimavoq.

- Tarnimikkut nappaatilinnut ataatsimut pilersaarusiortoqartariaqarpoq, soorlu Norgemi taamaasiortoqarsimasoq, Jeanett Bauer, Psykiatrisk Selskabimi siulittaasoq, oqarpoq.

- Sundhedsstyrelsi, Lægeforeiningi nunallu immikkoortui tarnimikkut nappaatilinnut pilersaaruteqarput - tamarmilli siunertatut nalunaarusiaannaapput, piviusumik iliuuseqarnissamut pilersaarutaanatik, taanna Informationimut oqarpoq.

Powered by Labrador CMS