Qaleralik Nunatsinni sulisitsili
Kristian Jeremiassen, Siumut, Naalakkersuisunut assigiinngitsunik apeqquteqarpoq. Ilaatigut qalerallit qanoq pilersaarutigineqarnerat pillugu
Qaasuitsup Kommunea qaleralinniarnermut qitiuvoq, taamaakkaluartoq suliffissaaleqiffiuvoq. Marsimi 1564-it suleffissaaleqisutut nalunaarsorneqarsimapput.
Sooq qalerallit suliffissaqartitsisinnaangaluartut Nunatsinniit annissorneqaannarpat, qanoq ililluni qalerallit Nunatsinni suliarineqartarnissaat qulakkeerneqarsinnaava? Kristian Jeremiassen, paragraf 37 naapertorlugu Naalakkersuisunut apeqquteqarpoq.
- Pilersaaruteqartoqarpat qaqugu taakkua atuutsinneqarsinnaalissanersut aamma tunngavilersorlugit nalunaaruteqarnissaq kissaatigaara, kiisalu aalisartut qaqugukkut qalerallinik tunisisinnaanerat ilumut sukannersunik malittarisassaqartitaalersimanersoq paaserusullugu.
- Taamatut killilersuineq aalisarpallaarnissaq pinngitsoorniarlugu atuutsinneqalersimappat? Qalerallit uniinnarlutik ulluni aalajangersimasuni pisarineqarnissartik utaqqiinnartanngimmassuk, ulluni aalisarfigeqqusaasuni pisariuminaassinnaapput. Aalisartut inuunerat taamatut ingerlanngilaq, taanna naqissusiivoq.
Taassuma apeqqutit makkua ullut qulit qaangiutsinnagit akissuteqarfiginissaat kissaatigaa:
Upernavimmiut aalisagartamik akigissaarnerulernissaat kissaatigaa, tassungalu atatillugu umiarsuarmik tunitsivissamik taavani ukioq manna inissiisoqarnissaa pilersaarutigineqarnersoq paaserusuppaa. Umiarsuarmik tunitsivissamik inissiisoqarpat aalisakkat akigissaarnerulersinnaappata tamanna Qaasuitsup Kommunianut innuttaasunullu iluanaarutigineqarnerussaaq.
2009-mi qalerallit suliarineqarnikuunngitsut 15.000 tonsit Nunatsinniit avammut aallarunneqarput. Qalerallit tamakkua Nunatsinni suliareqqaartalernissaat qulakkeerniarlugu Naalakkersuisut pilersaaruteqarpat?
Nunatsinni suliareqqaartalernissaat pilersaarutigineqarpat, tamanna qaqugu atuutsinneqalersinnaassava?
Uummannap eqqaani qaqugukkut qaleralinnik tunisinissamut malittarisassat nutarterneqarnikuuppat ?
Malittarisassat nutaat aalisarpallaarnissaq pinngitsoorniarlugu pilersinneqarnikuuppat imaluunniit tamanna sumik pissuteqarpa?
Ukioq manna Upernaviup eqqaani umiarsuarmik tunitsivissaqartitsinissamut akuersissummik qinnuteqaateqartoqarnikuua?
Ingerlatsiviit sorliit qinnuteqarsimanersut Naalakkersuisut nalunaarutigisinnaavaat?
2010-mi aamma 2009-mi Upernaviup eqqaani umiarsuarmik tunitsivissamik inissiinissamut akuersissummik qinnuteqartoqartarnikuua?
Upernaviup eqqaani umiarsuarmik tunitsivissamik inissiinissamut qinnuteqaatinik Naalakkersuisut itigartitsisarnikuuppat, taamaassappallu tamatumunnga suut pissutigineqarpat?
Ukioq manna Uummannap eqqaani umiarsuarmik tunitsivissamik inissiisoqassamaarpa?