Lego NASA-mut ilaalluni Jupiter-ilialerpoq
Avataarsualiartaat Jupiter-iliartoq taassuma nunarsuup (ullorissap) qanoq ililluni pinngorsimaneranik paasisassarsiortoq tallimanngorpat aallartinneqassaaq. Qallunaat atortuliaat avataarsualiartaammi atortorineqarput
USA-p tallimanngorpat avataarsualiartaat Juno, ukiuni tallimani Jupiter-ip tungaanut ingerlaartussaq aallartinneqassaaq - avataarsuani nunarsuit annersaat ornillugu.
Avataarsualiartaat misissuisarfittalik inuttaqanngitsoq 5 miliaarti koruuninik akilik, Atlas 4-raketi atorlugu avataarsuanut igeriunneqassaaq.
Florida-mi Cape Canaveral-imiit avataarsualiartaat Kalaallit Nunaanni nalunaatutaq naapertorlugu 13.34 aallartinneqassaaq.
Taanna Jupiter-ip tungaanut ukiuni tallimani ingerlaassaaq. Jupiter nunarsuatsinniit 2800 miliuuni kilometeritut ungasitsigaaq.
- Piffissaq utertittutut illugu sumit aallaaveqarnerluta, nunarsuillu qanoq pinngorsimanerat paasiniarutsigu paasissutissat Jupiter-imi pineqarsinnaassapput, avataarsua pillugu immikkut ilisimasalik Scott Bolton oqarpoq.
Juno ukioq 2016-imi apuukkuni Jupiterip avannaa kujataalu qulaavaalissavai. Tamanna siornatigut iluatsinneqarnikuunngilaq.
Nasa-p avataarsualiartitassaa inuttaqanngitsoq qallunaat assiliiviliaannik assiliiveqarpoq, paasisassarsiornermullu pingaaruteqaqaluni. Assiliivik ukiuni marlunni inunnit 15-init København-imi sananeqarsimavoq. Taassuma saniatigut aamma legomik ilusilersukkat pingasut ilaatinneqassapput.
Jupiter imeqarnersoq, qiterpiaalu soqarnersoq imaluunniit gassiinnaanersoq Juno iluaqutigalugu paasisinnaassallugu, NASA-miit neriuutigineqarpoq.
Amerikamiut avataarsualiartitsisarfiata 1989-imi Nasa Galileo aamma Jupiteriliartinnikuuaa, taannali ukiut sisamat ingerlaareerluni kaavitsiariarluni Jupiter-imut nakkarpoq.
Avataarsualiartaatit allat Voyager 1 aamma 2, Ulysses kiisalu New Horizons Jupiter saneqquttarnikuuaat.