Århusimi Inuiattut Ullorsiorneq

Ualikkut ullorsiornerup malunnartinneqarnerani inuit 100 missarpiaanniittut takkupput - kingorna grillerisoqarpoq

Århusimi Kalaallit Illuutaata Inuiattut Ullorsiorneq pissusissamisoortumik nalliussivaa. Ulloq naallugu sorpassuarnik sammisaqartitsilluni.

Pisarnertut ullaap tungaani aallartittoqarpoq erfalasoq amullugu, nereqatigiilluni nunattalu erinarsuutaanik erinarsorluni. Kingorna takkuttut 100-t missarpiaanniittut nerisassanik sassaallerfigineqarput. Tassa ullo´qeqqasiutinik ilaatigut raajanik, kapisilinnik, qaleralinnik, tuttumik minnerunngitsumillu grillpølsinik.

Tamatuma kingorna erinarsortoqarpoq, nipilersortoqarpoq, bankortoqarpoq, popcornisortoqarpoq ikumatitaliallu eqqaani pannakaatortoqarluni, naggataatigullu sisamat missaani kaffisoqatigiittoqarluni. Århusimili nalliuttorsiornerit tamaanga killeqanngillat. Unnukkut kalaallit peqatigiiffiat Kajak Kalaallit Illuutaanni grilleritsitsissaaq.

Powered by Labrador CMS