Skip to main content

Sisimiuni saqqummersitsineq

Sisimiuni eqqumiitsuliortut tamanut saqqummersitsinissaminnut periarfissinneqarput - Sisimiuni Taseralimmi 

 

 

Ukioq manna inuiattut ullorsiornermut atatillugu, Taseralimmi – Sisimiuni kulturikkut illorsuarmi saqqummersitsipput Kirsten Frederiksen, Ungaaq Poulsen kiisalu Hans Storch Johansen.

Saqqummersitsinerup siunertaraa inuit ulluinnarni illoqarfimmi inooqataasut oqariartuutaat saqqummersissallugit. Inuit taakku pingasut soqutigisaraat eqqumiitsuliorneq – qalipaaneq, taalliorneq nipilersornerlu. Tamarmik saqqummersitserusullutik attaveqarsimapput – sapiillisaarlutik imminut tatigalutik.

Saqqummersitsineq ammarneqarpoq sapaat 19. juni nal. 15, ilaquttanik ikinngutinillu najuuffigineqarluartumik. Saqqummersitsineq 26. junip tungaanut takuneqarsinnaavoq.

Ataani ilisaritinneqarnerat aturneqarsinnaavoq.

Kirsten Frederiksen (Kiistaaraq)

Qeqertarsuatsiaaninngaanneersuuvoq maannalu Sisimiuni najugaqarluni. Ilaqutariinni qalipaaneq takornartaanngilaq, tassami aataava Frank Frederiksen akkaalu aamma qalipaanermik ingerlataqartuupput. Kiisaataraq meeraanerminit aatani qalipaasoq isigiuarsimavaa aammalu nammineq qalipaasalerami akkaminit ilinniartinneqartarsimalluni. Ungasissutsit, qalipaatit tulluarsarneri, ilutsit assigisaallu ilaqutariit oqaluuserisarsimavaat.

Kiistaaqqap Nuummi pisiniarfiit assigiinngitsut arlallit aqqutigalugit tuiniartarsimavai aatsaalli saqqummersitsilluni.

Qalipagai takorluugaanit takusartagaanillu pinngorfeqarput, soqutiginninnermik nutaamillu misileerusunnermik aallaaveqarlutik.

Ungaaq Poulsen

Ungaaq Sisimiuni najugaqarpoq Maniitsulli eqqaani peroriartorsimalluni. Inuusuttuaraallunili taalliortalersimavoq maannalu atuakkiorsimalluni suli saqqummersinngisaminik.

Inuunermini naapittagai oqitsuinnaasimanngillat, taamaattorli aalajangersimavoq atukkani akueralugit ingerlaqqikkusulluni. Misigisartakkani taallatigut aniatittarpai, taamalu ulluinnarni inuunini ingerlateqqissinnaalersimallugu.

Oqaluttuarnermini ilaatigut oqarpoq: ”Meeraallunga inuusuttuaraallungalu inuusimavunga matoqqasoq, imminut ajukkuttoq. Inuk toqqarlugu oqaluussinnaanikuunngilara. Inuttulli sanarfinerma kingunerisaanik inuit saallugit oqaluuttalersimavakka – allaat ilisarisimanngisakka. Maanna sapiukkunnaarpunga avammut saqqummernissannut.”

Ungaap taalliaa ”Misigaanga nukissaqarlunga”

Inuuneq tupinnartorpassualik

atortuarlugu misigaanga

nakkaallunga inuunera

sapilertutut misigaara

 

Inuuneq naalliunnartorpassualik

atortuarlugu misigaanga

sequmilluinnarlunga inuunera

sapilertutut misigaara

 

Inuunera annaagaluttuinnalerlugu

misigaanga sapilerlunga

nukissaarullugu misigaanga

 

Inuuneq atortitaasoq

misigaanga qanoq

iliuuseqarfigisariaqarlugu

inuunera nalunngilara

misigaanga nukissaqarlunga

 

Hans Storch Johansen (talerpiatungaaniit assilisaq)

Hansi inunngorpoq 31. oktober 1988 Sisimiuni. Sisimiuni najugaqartuarnikuuvoq, soqutigisaralugit eqqumiitsuliorneq, allanneq, assiliineq, filmiliorneq nipilersornerlu.

Hansi autistiuvoq, tamannalu ammasumik oqaatigisarlugu. Sisimiuni innarluutilinnut tunngasunik aaqqissuussisoqartillugu peqataasarpoq, oqaasissaqaraangamilu annittarlugit.

Taseralimmi saqqummeerusunnini arlaleriarluni tusartittarpaa, ilumioqaramimi avammut saqqummertariaqartunik. Hansip silarsuaanut pulajumagaanni eqqumiitsuliai isiginnaarluarneqartariaqarput – eqqarsarnartuuppummi.

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER