Sisimiuni apersortittoq tilliffigineqartoq
Apersortittoq Sisimiuni oqaluffimmi apersortinnermi nalaani 7.000 koruuninik tilliffigineqarpoq
Apersortinneq nuannersuinnaasanngilaq.
Tamanna sapaatiummat ullaap tungaa Sisimiuni apersortittup malugaa.
Oqaluffimmi apersortinnerata nalaani taassuma aningaasivia 7.000 koruuninik, ullaakkut tunissutissarsiarisimasaanik imalik tillinneqarsimavoq.
Politikommissær John Davidsen Sisimiuni politiineersoq oqaluttuarpoq, sapaatiummat ullup qeqqata missaani, apersortittup tunissuitisiani 7.000 koruunit oqaluffimmut nassarsimasai tillinneqarsimasut Sisimiuni politiinut nalunaarutigineqarsimasoq.
- Naalagiarnerup nalaani nukappiaqqat angisuut marluk aningaasat tilleriarlugit oqaluffimmiit anisimasut, politikommissæri nalunaarpoq.
- Apersortittup ilaqutai ikiortigalugit nukappiaqqat taxa-nik angalaartut nassaarineqarput. Taakkua aningaasat ilanngangaatsiareersimavaat, amerlanersaali tigusinnaangamigit apersortittup nuannaarutigigaa, John Davidsen oqaluttuarpoq, nangillunilu:
- Tassunga atatillugu eqqaamasariaqarpoq - ingammik aningaasat taama amerlatigisut - aningaaserivimmut ikitinnagit arlaannut paarnaaruttarnissaat.