Skip to main content

Suliffissaaleqisut amerlanerit sulilissapput

2011-imi 2012-milu aatsitassarsiornermi uulisasiornermilu sulilersinnaanissamut immikkut periarfissiinissaq siunnertaralugu aningaasaliisoqarpoq

Naalakkersuisut juunip 16-anni 2011 ataatsimiinnerminni ilassutitut aningaasaliissutitut katillugit 15,5 mio. koruuninik Aningaasaqarnermut Ataatsimiititaliamut nassiussaqarniarnertik aalajangiuppaat. Aningaasaliissutit suliffeqarnermi ilaatigut aatsitassarsiornermi aamma uuliasiornermi ingerlatani ukioq manna 2012-milu suliffissaqartitsiniarnermut atorneqartussatut immikkut aningaasaliissutaapput. Taama Inuussutissarsiornermut Suliffeqarfinnullu Naalakkersuisoqarfimmiit tusagassiuutinut nalunaaruteqartoqarpoq.

Naalakkersuisut suliffissaaleqinerup iliuuseqarfiginiarneqarnerani ukioq manna 19,6 mio. koruunit immikkoortinniarpaat, 2012-imullu 5 mio. koruunit aamma immikkoortissinniarlugit. Ukioq manna immikkut aningaasaliissutaareersut atorlugit suliffissaaleqisunut immikkut iliuuseqarneq aallarteriissaaq nunattalu karsianut sunniuteqarnaviaratik.

Inuit amerlanerusut suliffissaqalernissaat siunertarineqarpoq, minnerunngitsumillu inuussutissarsiutini ullumikkut ineriartorfiusuni suliffeqarfeqalernissaq periarfissaqaqaluni, taama Inuussusissarsiornermut Aatsitassarsiornermullu naalakkersuisoq Ove Karl Berthelsen paasissutissiivoq.

- Iliuuseqarnissamut pilersaarut Naalakkersuisut suliffissaaleqinerup annikilliartornissaanik sapinngisaq tamaat iliuuseqarniarnerannik ersertitsivoq. Suliffissaaleqisummi sapinngisamik ikinnerulersinniartariaqarput. Immikkut ittumik iliuusissatut pilersaarut atorlugu ineriartorneq pitsaanngitsup ilorraata tungaanut saatinnissaanut maanna periarfissalerpugut, Ove Karl Berthelsen taama oqarpoq.

Inuussutissarsiornermut Aatsitassanullu Naalakkersuisoq naapertorlugu immikkut ittumik iliuusissanut pilersaarutit assigiinngitsorpassuarnik sammiveqarpoq, sukumiisumillu iluarsiiniarnissaq tunaartarineqartoq taamaattoq nunatsinni aatsaat misigineqartussanngorluni. Iliuusissarpassuit suliffissaaleqisunut iluaqutaanissaat ilisarnaatigaat. Suliffissaaleqisummi Suliffissarsiuussisarfimmut isiinaavittut isumagineqartalissapput piginnaanngorsarneqariarlutillu suliffittaassaminnut aallartissinnaanngortassallutik, tusagassiuutinut nalunaarusiami taamatut allatoqarsimavoq.

- Siunissaq nutaanik inuussutissarsiuteqarlernissamut periarfissiisussaq ornipparput. Tamaattoqarneratigullumi inuit ataasiakkaat piginnaanerminnik ineriartortitsinissaminnut periarfissinneqarnissaat piumasarineqarpoq, taamalillutimmi inuiaqatigiinnut namminneerlutik pilersuiqataalerniassammata. Inuimmi sumiginnarnissaat akissaqartinngilarput, taamaattoqaraangamimi alianartaqimmat. Taamaammat uuma pilersaarutip suliarineqarnera ilungersuussimavarput sukumiisumillu iliuuseqarnialerluta, Ove Karl Berthelsen taama nassuiaavoq.

Tusagassiuutinut nalunaarusiaq malillugu pilersaarut ilaatigut imatut imaqarpoq:

Suliffissaaleqisut piginnaassuseqassuseq tunngavigalugu immikkoortiterneqartarnerannik aaqqissuussineq ineriartortillugulu tamakkiisumik atortuulersikkiartuaassavarput, nuna tamakkerlugu siunnerfeqartumik assigiimmillu aaqqussuussinikkut.

Pikkorissaanikkut suliffissaaleqisut siunnersorneqarlutillu ingerlariaqqinnissamut aqqutissiuunneqartassapput, taamaaliornikkut innuttaasut ataasiakkaat siunnerfissamik nutaamik tunngaveqarlutik ingerlaqqissinnaanngorlugit.

Suliffissarsiuussisarfinni, Piareersarfinni nunaqarfiillu allaffiini sulisut piginnaanngorsarneqassapput, taamaaliornikkut aaqqissuussinerit pioreersut pitsaanerpaamik iluaqutigineqarsinnaaqqullugit.

Suliffissaaleqisut piginnaanngorsarneqarnerannut aningaasalliissutit minnerunngitsumik inuussutissarsiutinut nutaanut sammitinneqassallutik.

Nuna tamakkerlugu paasititsiniaanermik suliniutit, nunaqarfinni isorliunerusunilu innuttaasunut annermik saaffiginnittuussapput, taamaaliornikkut innuttaasut qiimmassarneqarlutillu periarfissanut nutaanut annertunerpaamik pitsaanerpaamillu paasissutissinnaaqqullugit, ingerlariaqqinnissaminnut periarfissaminnik iluaquteqarsinnaaqqullugit.

Immikkut ittumik iliuuseqarnissamut pilersaarut ukiup ataatsip missaani ineriartortinneqarsimavoq. Taamaasillunilu annertuumik peqqissaartumillu piareersaasioreerluni Naalakkersuisoqarfiillu atuumassuteqartunut KANUKOKA-llu peqataatinneqarnerisigut ineriartortinneqarsimalluni. Ilaatigut Inuussutissarsiutinut Suliffeqarnermullu Naalakkersuisoqarfiup kommunit suleqatigalugit suliffissaaleqisut nalunaarsorneqarneri nutaanerpaat pilersaarusiornermut atatillugu katersorneqarsimallutik.

- Suliat aallartinnissaanut 2012-mut utaqqinianngilagut. Inuimmi suliffissaaleqinermik eqqorneqarsimasut uani pineqarput. Taamaammat Aningaasaqarnermut Ataatsimiititaliaq akuersiniariarpat suliniutit aallartissavagut, Ove Karl Berthelsen taama naqissusiivoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER