Greenpeacep umiarsui Nunarput qimappaat
Greenpeacep umiarsuaatini marluk qimagutiteriarlugit Nunatsinni uuliasiornissamut akersuunnissaq qanoq ingerlateqqinneqassanersoq eqqarsaatersuutigilerpaat
Greenpeacep umiarsuaatai marluk nunatta imartaani Cairnimut akersuunneranni atorsimasaat nunatsinnit aallartissimavaat.
Tamanna Greenpeacemi generalsekretæriusoq Mads Flarup Christensen Ritzauimut uppernarsarpaa.
Taamaattoqarnerali nunatta avataatungaani uuliasiornissamut avatagiisinik illersuiniaqatigiiffiup akersuunneranik unitsitsinerunngitsoq aamma unnersiutigaa:
- Oqaluttariarsornitsinni iliuuseqartarneq paasititsiniaanerlu immikkoortittarpavut. Taavani iliuuseqaqqissanersugut suli ilisimaneqanngilaq, uuliasiornissamulli akerliulluta paasititsiniaaginnarnissarput qularineqassanngilaq, taama generalsekretæri unnersiorpoq.
Juunip 4-ni Greenpeacermiut 18-it Cairnip qilleriviisa aappaanut qallormata tigusarineqarput. Avatagiisinut illersuiniat qalloraluartut umiarsuit "Esperanza" aamma "Arctic Sunrise" aallavigisimavaat.
Ullut tallimat qaangiuttullu hollandimiut eqqartuussiviani Greenpeacermiut ukiumi affarmi tullinnguuttumi taamatut qilleriviit 500 meterinik qanilleqqissagaluarpatigik ullormut 375.000 koruuninik akiligassinneqartussanngorlugit eqqartuunneqarput.
Greenpeacermiut avatagiisinut mianerinninneq aallaavigalugu nunatta sineriaata avataani uuliasiortoqarnissaa kissaatiginngilaat.
Tamatumunnga akersuutiinnartoqassasoq Mads Flarup Christensenip naqissuserpaa:
- Qanorluunniit Cairnip inatsisileritoorpassuit atorlugit sorsuukkaluarunitigut akersuutiinnarumaarpugut.