Pisortanit ikiorsiissutit pillugit inatsisilerinermik pikkorissarneq
Kommunini inunnik sullissisartut ilaqutariit meerartallit isumaginissaannut sakkussaqarnerulissapput, kiisalu aalisartut piniartullu pisortanit ikiorsiissutisianik tunineqarsinnaanermut pisinnaatitaaffigisaat inunnik sullissisartut qulakkeersinnaanngussavaat
"Ilaqutariit ataataq, anaanaq qitornallu pingasut. Ataataasoq piniartuuvoq aalisartuullunilu, anaanaasoq nuliaavoq ikiuuttuulluni, taannali napparsimarululermat napparsimmavimmi sivisuumik uninngasariaqalerpoq. Ataataasup piniagai tunisaalu ilaqutariit inuussutigaat. Ilaanni ilaqutariit aningaasaqarniarnerat ilungersunartarpoq ilaannilu atoruminarnerusarluni. Aningaasarsiorfigitsillugu meeqqat amigaatigisartagaat angajoqqaajusut pisiarisarpaat. Tassa angajoqqaat aningaasaqarniarnerat ataatsimut isigalugu ilungersunarpoq, ullullu atugarliorfiusut atuutileraangata sipaagaqarsimanngimmata akissaqartaratik".
Qulaani assersuusiaq Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfiup pisortanit ikiorsiissutit pillugit inatsisilerinermik Kangerlussuarmi pikkorissartitsinerani atorneqarsimasoq tusagassiutinut nalunaarusiamiippoq.
Apeqqutigineqartorlu unaavoq: Pisortanit ikiorsiissutit imaluunniit meeqqanut inuusuttunullu ikiorsiisarnerit pillugit intsisiniittunik pisinnaatitaaffinnik ilaqutariit periarfissaqarpat?
Ilaqutariinnermut Naalakkersuisoqarfik maajip 29-niit juunip 1-ata tungaanut pikkorissartitsimmat pisortanit ikiorsiisarnermut aamma meeqqat inuusuttunullu ikiorsiisarnermut malittarisassat sammineqarsimapput. Pikkorissarneqartut tassaapput inunnik sullissisartut Kommune Kujallermeersut, Qeqqata Kommunianeersut, Qaasuitsup Kommunianeersut taakkulu nunaqarfiini inunnik sullissisartut. Aamma aalisartunut piniartunullu ikiorsiisarnermik malittarisassat pikkorissaatigineqarsimapput, peqataasullu taamaasillutik suliaminnut sakkussaqarluarnerulersimallutik, taama Naalakkersuisoqarfik tusagassiutinut nalunaarusiaani allataqarsimavoq.
Malittarisassat pikkorissarfiginissaat siunertarineqarsimavoq sullissinerullu nalaani ajornartorsiutaasartut aamma eqqartorneqarnissat pikkorissarnermi siunertaasimalluni. Ilaqutariimmi meerartallit inunnik isumaginnittoqarfik attavigigaangamikku pisortanit pilersorneqarnerat tamakkiisuunngikkuni ilaannakuusarpoq. Pikkorissartullu kissaataat naapertorlugu meeqqat inuusuttullu immikkut sammineqarsimapput.
Juunip aappaani immikkut ittumik pikkorissarfiusimavoq, tassanilu piniartunut aalisartunullu tunngatillugu pisortatigut ikiorsiissutinik inatsisit malittarisassartaanik atuineq sammineqarsimavoq, tassanilu KNAPK-mi SIK-milu sulisut siullerpaamik peqataasimallutik.
Inatsisini malittarisassat attuumassuteqartut eqqartorneqarput kiisalu pisortatigut ikiorsiisarnermi ilitsersuummi immikkoortoq nutaaq aamma eqqartorneqarsimalluni. Ullormi pikkorissarfiusumi namminersorlutik inuussutissartiortut isertittagaannut tunngasut pissutsit immikkut ittut qulaajaaviginissaannik pisariaqartitsisoqartoq paasinarsisimavoq. Tamatuma saniatigut pisortat ikiorsiisarnerat pillugu aalisartunut piniartunullu tunngaviusumik paasissutissiisussamik quppersagaliortoqarnissaa isumaqatigiissutigineqarsimavoq. Quppersagassaq Naalakkersuisoqarfik, kommunit, KNAPK aamma SIK suleqatigiissutigiumaarpaat.
Pikkorsissartitsineq inuppassuit akuuffigisimavaat, tassami inuit 50-t sinnillit peqataasimammata.
2011-imi ukiarpat Kommuneqarfik Sermersoormiut pikkorissartinneqarpata KNAPK aamma SIK peqataaqqissinnaatitaassapput. Taama naalakkersuisoqarfik paasissutissiivoq.