Anders And aqqaamavoq

Siorna Lars Løkke Rasmussen aamma Sidney Lee Andebymiunngortinneqarmata tuniniaanitsialattut nalinerneqaraluarpoq, aviiseeqqanimi Lars Grynte Rasmussen aamma Slibri Lee pilersinneqaraluarput.

Naallu tusaamasat peqqutaallutik aviiseeqqat amerlanerulaat tunineqaraluartut, aviiseeqqanik tunisat ataavartumik ikiliartuinnavissimapput, taam DR Kultur allaaserisaqarpoq.

Ukioq 2010-p affaani kingullermi aviiseeqqat Anders And & Co 38.896-it sapaatit akunneri tamaasa tunineqartaraluarput, 2011-mili sapaatit akunneri siulliit 11-t ingerlanerini agguaqatigiisillugu aviiseeqqat 37.198-it tunineqartalersimapput. Egmont Serieforlagimi tunisassiornermi ittuusup Martin Oestenip isumaa malillugu tuniniaanermi periutsit iluatsinnerliorsimanngikkaluarput, aviiseeqqanilli tunisat ikiliartuinnavinneri tikkuartorlugit.

- Ukiuni kingullerni tunisatta ikiliartorneri ilumoorpoq. Qaammatinili kingullerni tunisat appariartornerat unitsissinnaasimavarput, ullumikkullu siorna 2010-p affaani kingullermi tunisatta amerlassusaat angungajassimallutigu, taama Martin Oesten DR Kulturimut oqaluttuarpoq.

Ullumi Egmont Serieforlagermiut Anders And & Co immikkut saqqummiutissamaarpaat, tamatumuunali tusaamasakujuit ilaatinneqassanngillat. Saqqummersinneqartussamili qinngasaarisarneq immikkut sammineqassaaq, ilaatigut Rip Rap aamma Rupip meerapalaallu Børgep misigisai malinnaavigineqarsinnaassallutik. Taamatut nutaaliornermi Anders And & Co inuit akornanni susassareqatigiinnermut ilapertuutaaniarsarisussaassaaq, taama Martin Oesten nassuiaavoq.

- Anders Andip soraluai pissuserissaartuartuupput, aatsaalli taama pissuserissaarnissamik isuma uani saqqummiussassatsinni erseqqaritsigissaaq. Qinngasaarisarneq atuartartutta amerlanersaasa misigisareersimavaat, taamaammat immikkut samminiarparput, taama Martin Oesten oqarpoq saqqummersussanilu tullinnguuttuni angajoqqaat annersaasartut imaluunniit meeqqat nunani ineriartorfiusuni atugarisaasa sammineqarsinnaaneri tunuarsimaarfigineqarnavianngillat.

Inuit atugarisaat sammissallugit nuannarineqarpoq

Inuit atugarisaat Anders And-imi sammineqarnera tuniniaanitsialaavoq, taama Søren Schultz Jørgensen tusagassiisarfiit siunnersuisartut Kontrabandemeersoq oqarpoq.

- Rip Rap Rup-ilu qinngasaarinermut akersuunniarneranni ajornartorsiutit atuartartut amerlasuut misigisarsimasaanik samminninnerussaaq. Taamaammat qanilaarnermik pilersitsisoqassaaq, aviiseerarlu taamaasilluni ineriartortinneqassalluni, taamaasiortoqartillugulumi imaassinnaavoq aviiseeqqat amerlanerit tunisaalerneranik kinguneqartoq, taama Søren Schultz Jørgensen oqarpoq taassumalumi isumaa malillugu tusaamasat aviiseeqqamut akulerussuunneqarnerat tunisaqarnerulernermik kinguneqassasorinngilaa.

- Sidney Lee Andebymiunngortinneqarmat taava atuartartutoqqaniit avissaartoqalinnginnersoq apeqqusertariaqassaaq. Imaassinnaavormi normut ataasiakkaat tunisaanerulerneranik kinguneqartoq, taamatulli immikkut iliuuseqartaraanni sivisunerusoq isigalugu tunisaqarnerulernermik kinguneqarneq ajorpoq, taama Søren Schultz Jørgensen oqaluttuarpoq.

Tunisassianut qullersaasulli Martin Oestenip tusaamasakujuit immikkulluunniit aaqqissuisoqarnissaq piffissami aggersumi mattutissamaanngilai.
- Naamik taamaasiornavianngilagut. Pingaarnertulli innuttaatitavut toqorartilernavianngilagut, soorlu USA-mi aviiseeqqani taamaaliortoqartarsimasoq. Uagut taama naalliuperaartiginngilagut.