Suli matoqqavoq

Danmarkip silaannartaa annikitsoq marlunngornermi unnukkut nal. 20.00-ip tungaanut matoqqagallassaaq

Londonimi VAAC-mit (Vulcanic Ash Advisory Center) arsakut pujoralaanik takussutissat nutaajunerpaat. Titargaq: VAAC

Island-imi innermik anitsisartup arsakuisa Danmark-ip silaannartaa suli sunneqqavaat.

Silassamik ilimasaarutit kingulliit aallaavigalugit, Danmarkimi timmisartornermut qullersaqarfiata aalajangerpaa, Danmarkip silaannartaani, Nordsø-p, Skagerak-ip kiisalu Aalborg-ip avannarpasinnerusortaata qulaa 6 kilometerisut qaffasitsigisoq ilanngullugu suli timmisartorfigeqqusaassanngitsoq.

Silaannaq tamaani nal. 16.00-imiit 20.00-ip tungaanut timmisartorfigeqqusaassanngitsoq Naviair nalunaarpoq.

Jylland-ip avannarpasinnerusortaani qeqqanilu arsakoqarfik ussippallaassanngilaq, taamaammallu malittarisassat immikkut ittut naapertorlugit tamaani timmisartortoqarsinnaassaaq. Tamanna unnugu Danmarkimi nal. 20.00 tikillugu atuutsinneqassaaq.

Danmarkip silaannartaani timmisartornerit annikitsuinnarmik killilersuinermit akornuserneqassapput.

- Silaannaq pilugu paasissutissat kingullit nittartakkatsinni atuarneqarsinnaajuassapput – arsakoqarfiup malunnaatilimmik Danmarkip silaannartaani siaruaanneranut nutaarsiassat atuarneqarsinnaasarlutik, Naviair nalunarpoq.

Danmarkimiit Danmarkimullu timmisartornerit ataasiakkaat pillugit angalatitsivik imaluunniit timmisartuutileqatigiiffik angalaniartup atugaa paasiniaaffigineqarsinnaapput.

Sukumiisumik sumiinnersiuinerit timmisartuutileqatigiiffinnut mittarfinnullu nassiussorneqarput, pisortatigut angallannermik suliaqartut (NOTAM) aqqutigalugit. NOTAM-ip paasissutissiineri uani takusinnaavatit: briefing.naviair.dk

Aalborgimi eqqissillutik utaqqiinnarput. Aalborg-imi mittarfimmi pissutsit eqqissillutik malinnaaffigigaat, Ritzau-imit allaaserineqarpoq.

- Uagut timmisartuutigut kangianiit kimmut mikkiartortartussaapput. Silaannaq angallavigeqqusaanngitsoq kimmut 40 kilometerisut ungasitsigaaq.

- Unnukkut Oslo-liartartoq imaassinnaavoq akornuserneqartoq, kisianni taanna allakkoortussanngortissinnaavarput.

Aalborg-ip mittarfiani pisortaq, Søren Svendsen, check-in.dk-mut oqarpoq.

Silassamik ilimasaarutit kingulliit naapertorlugit arsakoqarfiup sumiinnera pissutigalugu, qallunaat timmisartornermut qullersaqarfiata aalajangerpaa, tamaani silaannaap angallavigineqannginnisssaata sivitsornissaa.

Nordsø-p, Skagerak-ip, Thy-p ilaata kiisalu Aalborgip avannaata kippasinnerusortaata qulaa 6 kilometerisut qutsitsigisoq ilanngullugu angallavigineqaqqusaanngilaq.

Kalaallit Nunaannut siaruaappoq Arsakoqarfip aamma Kalaallit Nunaata qulaanut siauaappoq. Arsakoqarfik maannakkut kitaanut Ilulissaniit avannamut Qaarsut tungaannut kangianullu Nerlerit Inaata avannanut siaruaattoq, Naviair nalunaarpoq.

Tamaani 6 kilometeri ataallugu timmisartornissaq, Nunatta kitaani nalunaaqutaq naapertorlugu 16.00-ip tungaanut inerteqqutaagallassaaq.

Nutserisoq Ulf Fleischer

Powered by Labrador CMS