Skip to main content

Greenpeacep Ove Kaali oqallinnissamut qaaqquaat

Greenpeacep paasititsiniaanermi qullersaata Jon Burgwaldip Ove Karl Berthelsen oqaloqatigiumallugu qaaqqusimavaa, tassani ´Best Practise´ Norgemiullu naliginnaasumik maleruagassaat suunersut paasitinniassagamigit, aamma Kalaallit Nunaata piumasaqaatai Cairn-imit malinneqassappata qanoq iliuuseqartoqartariaqarnersoq eqqartorneqassalluni

Greenpeacermiut aamma namminersorlutik oqartussat "best practise"-p suuneranik, Norgemilu uuliamik piiaanermi issittumilu uuliasiornermi suut maleruagassarineraat isumaqatigiissutigisinnaanngilaat. Greenpeacep tusaaneqannginnissaanik Namminersorlutik oqartussat siornatigut kaammattuutigisareersimavaat. Tamanna namminersorlutik oqartussat quppersagaani atuarneqarsinnaavoq taakkulumi uani tigulaariffigisaqattaassavagut. 

Namminersorlutik oqartussat nalunaarusiaatalumi Greenpeacekkormiut paasititsiniaanermut qullersaata Jon Burgwaldip Greenpeace Danmarkip quppersagaani akissuteqarfigisimavaa.

Jon Burgwaldip ilaatigut allaaserisaa malillugu namminersorlutik oqartussat quppersagaanni assersuusiorpoq, oqarlunilu Cairnikkormiut aasaq manna nunatsinni qillerilerunik pisariaqanngitsumik mingutsitsissamaarput.

- Naatsumik oqaatigalugu: Cairnikkormiut Aatsitassarsiornermillu pisortaqarfiup oqaatigisareerpaat Kalaallit Nunaat ´best practise´malillugu Norgemilu maleruagassat nunarsuarmi sukanganerpaat malillugit qillerisoqassamaartoq unnersiortarput. Taamaattoqanngilarli. Norgemiummi iluliarasaartumi qillerinissaq inerteqqutigaat. Aamma Namminersorlutik oqartussat kemikalianik aappaluttunik qalipaaserneqarsimasut assersuutaat aamma assersusiorfigisimavaa. Ukiormi manna aasakkut qillerisoqarpat kemikaliat aappaluttunik nalunaaqutserneqarsimasut imaanut kuutsiinnarneqartussat norgemiut danskillu ukioq ataaseq imaanut kuutsissimasaaniit annertunerussamaarpoq. Norgemiut uuliasiorfippassuisa ukiup ataatsip ingerlanerani 32 tonsip imaanut kuutsittarpaat, danskillu Nordsømi uuliasiorfiini ukiumut 1,6 tonsit imaanut kuutsinneqartarput, taama Jon Burgwald paasissutissiivoq.

- Politikereq akisussaasoq Aatsitassarsiornermullu pisortaqarfimmi qullersaasoq tassaavoq aatsitassarsiornermi naalakkersuisoq Ove Karl Berthelsen, taassumalumi ´Greenpeacep nunatsinni nipaarsaarussai´- nik ilanngutassiami akisussaasutut nammineq inississimavoq. Kiisami oqaloqatigiumammatigut nuannaarutigiinnarpara, tassami suliap ingerlanneqarnerata nalaani isertuusserpalaarnersuaq atuussimammat, naalakkersuisunilu ilaasortaq oqaloqatigiuminaassimaqaluni. Soorunami oqaloqatigiinnerput quppersakkat aqqutigalugit ingerlanneqarnera tupinnakulussorinarsinnaavoq.
Tassami Greenpeace uuliamut tunngasunik ukiorpassuarni suliaqartareerpoq, nunarsuarlu tamakkerlugu suliniaqatigiiffik siaruaassimariarmat paasissutissarpassuit nunarsuarmit tamaneersut pigereerpavut, taama Jon Burgwald naqissusiivoq.

Taamaammat Jon Burgwaldip Ove Karl Berthelsen naapikkusukkaluarpaa, tassanilu ´best practise´sunaanersoq norgemiullu naliginnaasumik maleruagassaat suunersut, kiisalu Cairnip nunatta piumasaqaataanik malinnissappata suut pisariaqartinneqassanersut oqaloqatigiissutigiumallugit.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER