Namminersortunngorsaanermut maleruagassat erseqqarissut Tele-p ujartorpai
Tele Greenlandip siulersuisuisa siulittaasuata Agner Markip suliffeqarfiup ataatsimeersuartitsinerata nalaani niuerfigisami namminersortunngorsaanissamik maleruagassat erseqqarissut ujartorpai
Marlunngorneq maajip 17-iani Nuummi ataatsimeersuartoqarmat taamatut oqaaseqartoqarnera saqqummerpoq, tassami Nuuk Skynet Nuummi, Sisimiuni Ilulissanilu sullissisinnaanermut akuersissummik namminersorlunik oqartussanit pissarsisimasoq paasinarsisimammat. Taamatummi namminersortunngorsaanerup kingunerisassaa tassaavoq nunatta inuisa 45 procentiisa internettimut attaviliisinnaasut assigiinngitsut qinersinnaanngussammatigik.
Namminersortunngorsaanerli iluatsissappat taava maleruagassat erseqqarissuusariaqassapput, taama Agner Mark ataatsimeersuarnerup nalaani naqisusiivoq.
Inatsisitigut toqqammavissap suliarineqarnissaa Telestyrelsip massakkorpiaq amigaatigaa, toqqammavissamimi maleruagassat sukumiisut amigaataapput, tassami Tele Greenlandip namminersortunut internettimut aqqutissat qanoq annertutigisut tunisinnaanerai ilaatigut takussutissaqanngimmata.
- Inatsisit annertussusiisinnaanerillu erseqqarissut inissinneqareersimanissaat pingaaruteqarpoq, taamaasiortoqareerpammi suliffeqarfiit ingerlanneqarnissaannut erseqqarissunik takussutissaqalissammat. Taamaammat tamakku angutserlugit Telep sapinngisannguani naapertorlugu oqartussaasut suleqatigissavai, taama Agner Mark oqarpoq.
Suliaq ingerlavoq
Attaveqarnermut naalakkersuisup Jens B. Frederiksen, Demokratineersup inatsisitigut suliap ukiup massuma ingerlanerani naammassineqarnissaa ataatsimeersuarnerup nalaani neriorsuissutigisimavaa.
Suliffeqarissuaq Tele Greenland siorna 2010-mi akileraarutit ilanngaatigereerlugit 47,4 million koruuninik sinneqartooruteqarpoq. Tamatumalu kingunerisaanik piginnittaa, tassa Namminersorlutik oqartussat, 32 million koruuninik aningaasannappoq.