Skip to main content

Qalasersuaq avannarlermik piumasaqarneq Løkke-p uppernarsarpaa

Savalimmiormiut Kalaallillu qanimut suleqatigineqarnerisigut issittumi najoqqutassiortoqarpoq, taama ministeriuneq Lars Løkke Rasmussen ullumi tusagassiortunik katersuuttitsinermi oqaaseqarpoq

Ullumi sapaatit akunnerani massumani tusagassiortunik katersuutsitsinermi Danmark, Kalaallit Nunaat, Savalimmiullu qanimut suleqatigiillutik qalasersuaq avannarlermik noqqaassuteqarnerat ministeriunerup Lars Løkke Rasmussenip uppernarsarpaa.

Piumasaqaat Kunngeqarfiup issittumi najoqqutassartaassaani imaqarniliami qaammatip tulliani saqqummersussami takuneqarsinnaavoq.

- Issittup ilaanik piumasaqaateqarnerput siornatigut oqaatigisareerparput, piumasaqaatittalu sumorpiaq sammissanersut issittumi najoqqutassartaassami massakkorpiaq suliarileruttorparput, tamannalu Savalimmiut Kalaallit Nunaallu qanimut suleqatigilluinarlugit ingerlanneqaleruttorpoq, taama Lars Løkke Rasmussen tusagassiortunik ullumi katersuuttitsinermi oqaaseqarpoq.

Taama ataatsimoorussamik Kunngeqarfimmi najoqqutassiornissaq junillu 16-iani saqqummiunneqartussatut taggissami Kuupik Kleistip suliniutigalugu aallarnersarsimavaa.

Danskit naalagaaffeqatigiiffiata qalasersuarmik avannarlermik piumasaqalernerat  aatsaavissuaq pisortatigoortumik politikkikkut anguniagaasutut danskit naalakkersuisuisa ullumi tassa suaarutigigaat aviisi ullormut saqqummersartup Informationip allaaserisimavaa. Imaqarnersiuinerlumi atuaraanni qalasersuaq avannarlermik, Kalaallit nunaata ilaani Savalimmiullu ilaani allanik sisamani noqqaassuteqarnissamut danskit piareersimanerat takuneqarsinnaavoq.

Taamaattoqarnerali Ilulissani 2008-mi oqaaseqaasiamut naapertuutinngilaq, tassanimi Qalasersuaq avannarlermik saqitsaannerit unitsinneqarnissaat isumaqatigiissutigineqarsimammat.

Ilulissani 2008-mi issittup imartaanik nunat tallimat piginnittuusut ataatsimiimmata taamani nunanut allanut ministeriusimasup Per Stig Møllerip qalasersuaq avannarlermik saqitsaannerit unitsissimagaluarpai. Taamaammat allakkiaq ataasituannguaq pisuulluni qalasersuaq avannarlilerngusaanneq aallarteqqeriikatappoq.

"Danmark/Kalaallit Nunaat, Canada, Norge, Rusland aamma USA isumaqatigiinniarneq aqqutigalugu aaqqiagiinngissutit qaangerniartassagaat Ilulissani isumaqatigiissutaagaluarpoq, taamaasillutillumi qalasersuaq avannarlilerngusaanneq unitsinniassammassuk", tamanna nunanut allanut ministeriaqarfiup quppersagaanni atuarneqarsinnaavoq.

Inuit pillugit najoqqutassiaq 

Issittumi najoqqutassiartaassaq malillugu issittumi inuit iluaqutigisinnaasaanik piujuaannartitsinissallu aqqani ineriartortitsineq ingerlanneqarnissaa kunngeqarfiup qulakkeertussaavaa.

"Issittumi najoqqutassiassaq tassaavoq issittumi inuit iluaqutigisinnaasaanik ineriartortitsinissamik najoqqutassiineq, tamannalu issittumi najoqqutassiartaassami imaqarniliukkiami atuarneqarsinnaasoq", SermitsiaqAG-p pissarsiarisimavaa.

"Taamatut ineriartortitsisoqarniarpat issittumi inuisa pisinnaatitaaffii ataqqineqartariaqarput, ilaatigut pisuussutinik atuisinnaatitaaneri, kultooritoqaasa, periusitoqaasa, ileqqutoqaasa inooriaasaallu ataqqineqarlutik pisinnaatitaaffiisa salliutinneqarnerisigut tamanna pisinnaavoq", tamanna najoqqutassiartaassami nittarsaanneqarpoq, taamaasiortoqarniallikkersaarneralumi namminersorlutik oqartussat kissaataat ICC-kkormiullu ukioq manna Ottawami issittumi qullersat ataatsimiinnerini piumasarineqartunut naapertuuppoq.

"Danmarkip Kalaallillu Nunaata suleqatigiinnerat Issittup inoqqaavisa periarfissanik nutaanik pilersitsivigai, taamaalilluni Kalaallit Nunaata namminersornerata, pinngortitamik nakkutiginninnera, silap pissusaanut politikkimut, avatagiisinullu politikkimut kiisalu kultoorimik eriagisaqarluni tammatsaaliuineq nunarsuatsinni nunap inoqqaavinut maligassatut periarfissitsivoq. Taamatut ittoqarnera nunanut allani nunat inoqqaavisa pisinnaatitaaffeqalerniarnerinut anguniagaqarnerannullu Kunngeqarfiup nunarsuup sinnerani suliniarneranut pingaaruteqarluinnassaaq", tamanna imaqarnersiukkiami Sermitsiap sapaatit akunnerani kingullermi saqqummiussaani atuarneqarsinnaavoq.

Kunngeqarfiup issittumut najoqqutassiartaassaani imaqarnersiukkami ilanngussimasatsinni atuaruk.

Ilulissani isumaqatigiissusiaq 2008-meersoq ilanngussimasarput uani atuarsinnaavat.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER